«Ձեզ ի՞նչ, ոչ ձեր հոր գրպանից, ոչ էլ ձեր կողմից նախկինում պատգամավոր աշխատած ճիվաղների գրպանից»
![](https://168.am/wp-content/uploads/2015/06/Tigran-Urixanyan.jpg)
Այսօր ԱԺ նիստում Ընտրական օրենսգրքի քննարկման ժամանակ պատգամավոր Տիգրան Ուրիխանյանը դատողություններ արեց «մերոնք» ու «ձերոնք» բաժանումներից, «իշխանական պրոեկտներից» և հայտարարեց, թե այն մոդելում, որտեղ իշխանությունը կիրառում է սեփական վարչական ու ֆինանսական լծակները և «թոզ փչողներին», առաջանում են ճեղքվածքներ:
Ըստ նրա` այդ ճեղվածքները փակում են նրանց առջև, ովքեր «նրանց տակ չպառկելով», բայց միևնույն ժամանակ հիստերիկ ձևաչափից դուրս, կիրթ ու պարկեշտ սկսում են ներգրավել մարդկանց մեծ թվեր ու նրանց համակրանքը: Տ.Ուրիխանյանը նշեց, որ թե նրանց առաջ փակվում են բոլոր մուտքերն ու անգամ մութ շավիղները. «Դրան բախվել եմ նաև ես ու իմ թիմակիցները»:
Տ.Ուրիխանյանի խոսքով` իրենց դեմ սկսել են պայքարել քրեական միջոցներով, քանի որ «Ալյանսը» իշխանական ընտրական պլանավորված քարտեզում չկա, բայց պատասխան են տալու բոլոր նրանք, ովքեր ինչ-որ «ճիվաղների բերանն են գցում», թե որտեղից Տիգրան Ուրիխանյանին միջոցներ` առանձնատուն կառուցելու համար. «Ձեզ ի՞նչ, ոչ ձեր հոր գրպանից, ոչ էլ ձեր կողմից նախկինում պատգամավոր աշխատած ճիվաղների գրպանից: Վարկերից, աշխատավարձից, օրինական միջոցներից: Գողը չէ, հանցագործը չէ, որ պետք է գնահատի իմ ունեցվածքը»:
Ակնարկելով «Անալիտիկ» կայքի հրապարակած նյութերն իր մասին, որ հանդես է եկել «Հրազդան ցեմենտի» վերագործարկման, իրենց կապել են ՎՏԲ-ի ու Ադրբեջանի հետ. «ՎՏԲ-ն էլ ձեր գլխին, Ադրբեջանն էլ ձեր գլխին, ձեր մութ ու կեղտոտ գործարքներն էլ ձեր գլխին»:
Ուրիխանյանը խոստացավ վաղը հայտարարությունների ժամին առավել մանրամասն անդրադառնալ «Անալիտիկի» գործին:
«Պարոն Ուրիխանյան, ես կարծում եմ, որևէ պատգամավոր այստեղ պաշտպանական ճառ ասելու կարիք չունի: Պատգամավորը ժողովրդի ընտրյալն է և կարիք չունի արդարանալու: Ես` որպես իշխանություն և ձեր գործընկեր, կարող եմ ասել` դուք մեր պրոեկտներում չկաք»,- արձագանքեց ԱԺ փոխխոսնակ Էդուարդ Շարմազանովը: