NASA Space Apps Challenge. հայտնի են հայաստանյան փուլի հաղթողները

NASA Space Apps Challenge մրցույթ-մարտահրավերն առաջին անգամ անցկացվեց Հայաստանում:

Ինչպես արդեն տեղեկացրել ենք, մրցույթի կազմակերպիչը «X-Tech Creative Studios» ընկերությունն է՝ կազմակերպչական հանձնաժողովի նախագահ և ընկերության տնօրեն Արման Աթոյանի ղեկավարությամբ: ՀՀ Գիտությունների ազգային ակադեմիայի Բյուրականի Աստղադիտարանի միջազգային համաժողովների կենտրոնում 24 ժամվա ընթացքում տեղի ունեցած մրցույթը, ըստ կազմակերպիչների՝ գերազանցեց բոլոր սպասելիքները:

Մրցույթի կազմակերպիչ Արման Աթոյանը 168.am-ի հետ զրույցում նշեց, որ չնայած այն բանին, որ մասնակցիները չէինք քնել 24 ժամ՝ բոլոր ներկայացումները շատ որակով էին:

«Ժյուրին անգամ շեշտեց, որ տպավորության տակ է այն բանից, թե երիտասարդները ինչ պատրաստ են, ինչ գլոբալ խնդիրներ են դրել լուծման»: 

Մրցույթի ավարտին պարզ դարձան հաղթողները:

3-րդ տեղը գրավեց Ultimate Space Simulator նախագիծը, որը Unreal Engine 4-ի միջոցով ստեղծել էր ճանապարհորդություն դեպի Մարս սիմուլյացիա: Ըստ գաղափարի՝ պետք է հնարավոր դարձնել 3D միջավայրում Մարսի վրա կոլոնիայի ստացումը և կազմակերպել սիմուլյացիա 3D միջավայրում: 

2-րդ տեղում PEPERONI թիմն է: Թիմը ներկայացրել էր 2 նախագիծ: 1. Դռոնների կառավարման տեղեկատվական պլատֆորմ՝ դռոնների անվտանգ թռիչքը ապահովելու համար: 2. Հատուկ երաժշտական հավելված` տիեզերագնացների սրտի աշխատանքը մոնիտորինգ անելու համար: 

Մրցույթի հաղթողը Ճանապարհորդություն դեպի Մարս բաժնում ներկայացած MARS LIVE նախագիծն է: Թիմը ստեղծել է մոբայլ հավելված, որը թույլ է տալիս սիմուլացիա անել մարդկանց կոլոնիյա Մարսի վրա: GPS համակարգի համադրումով օգտվողը տեսնում է իր դիրքը Մարսի վրա, կարող է ստանալ և կատարել առաջադրանքներ, հաղորդակցվել այլ մարդկանց հետ որոնք օգտվում են հավելվածից: Հավելվածը օգտվում է մի շարք API-ներից և հավելվածի մեջ հավաքում մեծ քանակությամբ անհրաժեշտ ինֆորմացիա: 

Հաղթող նախագծերից զատ կային շատ աչքի ընկած նախագծեր, որոնք նույնպես հավակնում էին հաղթանակի: Արման Աթոյանը նշեց, որ իրականում ունենք շատ նախագծեր, որոնք կարող են փայլել դրսում:

Սիրարփի Աղաբաբյան