Այսօր վերջին հրաժեշտը տվեցին հակառակորդի անօդաչու ուղղաթիռի գնդակոծությունից զոհված Դավիթ Սարգսյանին
vorotan.am-ը գրում է. Շաղատ գյուղի պանթեոնում ավելացավ եւս մեկ հողաթումբ` Դավիթ Բագրատի Սարգսյանի շիրմաթումբը:
Իր մարտական ընկերների հետ Դավիթ Սարգսյանը ապրիլի 3-ին մեկնել էր Արցախ` պաշտպանելու երկրի սահմանները, սակայն ապրիլի 4-ին խոցվել էր Մարտակերտի տարածքում` թշնամու անօդաչու ուղղաթիռի գնդակոծությունից:
Նրա աճյունն ամփոփվեց հարազատ գյուղի` Շաղատի` արցախյան հերոսամարտում զոհվածների պանթեոնում, զինվորական կարգով: Ամբողջ գյուղը սգում էր: Վերջին հրաժեշտ տալու էին եկել ոչ միայն համագյուղացիները, այլև հարևան համայնքներից ու մարզերից ժամանած սգակիցներ: Համատարած խտացած տխրություն էր: Անասելի ցավ, ափսոսանք, բայց` հպարտության զգացումն էր թեւածում ողջ համայքնում` ամեն ազատամարտիկի, յուրաքանչյուր հայ զինվորի համար:
– Դավիթ Սարգսյանը կիսատ գործ ուներ և առանց երկմտելու որոշեց ու մեկնեց,- նշում են համագյուղացիները:
Հերոսի հուղարկավորությանը ներկա էին նաև գյուղի երիտասարդները, ովքեր քաջ գիտակցում են, որ պատերազմն ավարտված չէ, իսկ հրադադարը դեռևս խաղաղություն չէ: Պատասխանատվություն են կրում և պատրաստ են հարկ եղած դեպքում ավարտին հասցնել նահատակված հերոսների կիսատ թողած գործը, հասկանում են նաեւ, որ հերոսների թափած արյունը անտեղի չի լինի…
Հավերժ փառք մերօրյա անմահ հերոսներին:
