Զինծառայող Հովհաննես Հարությունյանին սպանել են. ծառայակցին մեղադրանք է առաջադրվել

Մարտի 17-ին ՊԲ հարավային ուղղությամբ տեղակայված զորամասերից մեկի պահպանության տեղամասում զինծառայող Հովհաննես Հարությունյանի մահվան դեպքով մեղադրանք է առաջադրվել նրա ծառայակցին: ՀՀ Քննչական կոմիտեից 168.am-ին հայտնեցին, որ քրեական գործով ձեռք են բերվել բավարար ապացույցներ, որ տեղի ունեցածը սպանություն է:

Քրեական գործի շրջանակներում Հովհաննես Հարությունյանի ծառայակից ընկերոջը սպանության հոդվածով մեղադրանք է առաջադրվել: Միջնորդություն է ներկայացվել դատարան՝ նրա նկատմամբ կալանաքը որպես խափանման միջոց ընտրելու վերաբերյալ:

Նշենք, որ ավելի վաղ քննչական կոմիտեն հաղորդագրություն էր տարածել այն մասին, որ նախնական տվյալներով՝ մարտական դիրքում թույլ է տրվել զենքի հետ վարվելու կանոնների խախտում, որի պատճառով զինծառայող Հ.Հարությունյանը գլխի հատվածում ստացել է մահացու հրազենային վնասվածք։ Հարուցվել էր քրեական գործ՝ զենքի հետ վարվելու կանոնները խախտելու հետևանքով անզգուշությամբ զինծառայողի մահ առաջացնելու դեպքի առթիվ։