Ռուսաստանցիների մեկ երրորդը ցանկանում է նախագահի պաշտոնում կնոջ տեսնել
«Լեւադա կենտրոնի» կողմից անցկացված հարցման արդյունքների համաձայն՝ ռուսաստանցիների մեկ երրորդը ցանկանում է, որ առաջիկա 10-15 տարում կինը զբաղեցնի Ռուսաստանի նախագահի պաշտոնը:
Հարցմանը մասնակցած կանանցից դա ցանկանում է գրեթե կեսը (44 տոկոս), իսկ տղամարդկանցից՝ յուրաքանչյուր հինգերորդը (21 տոկոս): Բոլոր հարցվածների 20 տոկոսը չի ցանկանում կնոջ տեսնել նախագահի պաշտոնում:
Ճնշող մեծամասնությունը (77 տոկոս) դրական է վերաբերվել քաղաքականությանը կանանց մասնակցությանը, 64 տոկոսն ասել է, թե կցանկանար կանանց տղամարդկանց հետ հավասար տեսնել պետական բարձրագույն պաշտոններում:
2014 թվականին նախագահի պաշտոնում կնոջ տեսնել ցանկանողների թիվն ավելի մեծ էր. դա ցանկանում էր հարցվածների 46 տոկոսը:
