ՆԱՏՕ-ն աջակցում է ԼՂ հակամարտության կարգավորմանն ուղղված ԵԱՀԿ Մինսկի խմբի ջանքերին. Ջեյմս Ապաթուրայ
Ադրբեջանի նախագահ Իլհամ Ալիևն այսօր ընդունել է Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապաթուրային, հայտնում է APA գործակալությունը:
Կողմերը զրույցի ժամանակ նշել են, որ Ադրբեջանի ու ՆԱՏՕ-ի միջև կան հաջող կապեր, բարձր է գնահատվել Ադրբեջանի ավանդը Աֆղանստանում անցկացվող խաղաղարար օպերացիաների շրջանակում միջազգային անվտանգության ապահովման գործում, հայտնում է գործակալությունը:
Հանդիպմանը կողմերն անդրադարձել են նաև Լեռնային Ղարաբաղի հակամարտության կարգավորման շուրջ ստեղծված վիճակին:
Լրագրողների հետ հանդիպմանն Ապաթուրայը հայտարարել է, որ ՆԱՏՕ-ն աջակցում է Լեռնային Ղարաբաղի հակամարտության կարգավորմանն ուղղված ԵԱՀԿ Մինսկի խմբի ջանքերին:
«Դաշինքն ուղղակիորեն ներգրավված չէ Լեռնային Ղարաբաղի հակամարտության կարգավորման գործընթացում, սակայն մեր դիրքորոշումն այն է, որ մենք աջակցում ենք ԵԱՀԿ Մինսկի խմբի ջանքերին ու հակամարտության խաղաղ կարգավորմանը»,- ասել է նա:
Հիշեցնենք, որ Ջեյմս Ապաթուրայը մի շարք հանդիպումներ կունենա Ադրբեջանի պաշտոնատար անձանց հետ, այդ թվում՝ երկրի արտգործնախարար Էլմար Մամեդյարովի ու պաշտպանության նախարար Զաքիր Հասանովի հետ:
Ադրբեջանի ու ՆԱՏՕ-ի համագործակցությունը իրականացվում է «Համագործակցություն հանուն խաղաղության» ծրագրի շրջանակում:
