«Դե ձանձրացրիք ինձ արդեն». Նավասարդ արքեպիսկոպոս Կճոյանը՝ լրագրողներին

Հայ առաքելական եկեղեցու Արարատյան հայրապետական թեմի առաջնորդական փոխանորդ Տ. Նավասարդ արքեպիսկոպոս Կճոյանն այսօր «Եռաբլուր» զինվորական պանթեոնում էր: Նա շնորհավորեց Հայոց բանակի տոնի առթիվ: Լրագրողների հետ նրա հարցուպատասխանը ներկայացնում ենք ամբողջությամբ:

– Սրբազան հայր, որևէ առնչություն ունե՞ք այդ գործի հետ (խոսքն օֆշորային հայտնի սկանդալի մասին է):

– Բացարձակ ոչ:

– Ինչպե՞ս կմեկնաբանեք:

– Որ չունեմ, ի՞նչ պատասխանեմ:

– Իսկ եթե դատարան կանչեն, չե՞ք գնալու:

– Արդեն պատասխանել եմ:

– Սրբազան հայր, «Բենթլիի» ճակատագիրն ի՞նչ եղավ, վաճառե՞լ եք, նվիրե՞լ եք: Ի՞նչ եղավ, ի վերջո:

– Շնորհավորում եմ Բանակի տոնի առիթով, ուրիշ ասելիք չունեմ:

– Ձեր անունն է հոլովվում, Ձեր վարկն է, Ձեր հեղինակությունն է:

– Է՜, դուք էլ եք հոլովվում:

– Դատարանում Ձեզ մեղադրանք է առաջադրված, Ձեզ մեղադրում են, չե՞ք ուզում հակադարձել: Եթե լռում եք, նշանակում է՝ մեղավոր եք, ընդունում եք Ձեր մեղավորությունը:

– Ձեր հարցերին ես լուրջ չեմ վերաբերում:

– Հանրության կարծիքը լո՞ւրջ է Ձեզ համար:

– Դու հանրության ներկայացուցիչ չես:

– Ինչո՞ւ են մեր հոգևոր հայրերը թանկարժեք, շքեղ կյանքով ապրում:

– Ցտեսություն, ժողովուրդ:

– Չունե՞ք ոչինիչ ասելու հանրությանը:

– Չէ, դու հանրություն չես ինձ համար: Դուք ինձ ձանձրացրեցիք:

– Իսկ ի՞նչ անենք, որ չձանձրանաք:

– Խելոք եղեք, խելոք:

– Ձեր բիզնեսների մասով ի՞նչ կասեք: Jose-ը, ըստ տեղեկությունների, օրինակ Ձերն է:

– Քոնն ա:

– Չեմ ուզում, շնորհակալ եմ:

– Դե իմը չի, ո՞նց տամ քեզ:

– Սրբազան հայր, ի վերջո…

– Դե ձանձրացրիք ինձ արդեն:

– Ինչո՞վ ենք ձանձարցնում, Սրբազան հայր:

– Խելոք հարցեր չեք տալիս:

– Սրբազան հայր, մամուլն անդրադարձավ, որ «Բենթլին» նվիրել եք:

– Վաղուց ևեթ:

– Սրբազան հայր, գոնե հոգևոր աշխարհից կարո՞ղ եք խոսել:

– Չհոգնեցի՞ք ինձնից:

– Չէ, չենք հոգնել:

– Է, ես ձեզ հոգնեցրի:

– Հոգևորականները պետք է հանդուրժող լինեն սովորաբար:

– Ավելի հանդուրժող ինչպե՞ս լինեմ:

– Սրբազաբ հայր, քրեական գործ կա:

– Ո՞ւմ վրա: Ի՞մ վրա:

– Կա քրեական գործ, որտեղ շոշափվում է Ձեր անունը:

– Ով շոշափում է, թող նա էլ բացատրի:

Նավասարդ արքեպիսկոպս Կճոյանը մոտեցավ մեքենային, նորից շնրհավորեց տոնի առթիվ և ասաց. «Եվ բարի եղեք մի քիչ»: