NASDAQ OMX ԱՐՄԵՆԻԱՆ հայտարարում է հայաստանում առաջին ՈՒՎԿ ապահովված պարտատոմսերի ցուցակման մասին
Հունվարի 27-ի պաշտոնական արարողության ժամանակ NASDAQ OMX Արմենիան նշեց Հայաստանում առաջին ապահովված պարտատոմսերի թողարկման հաջող մեկնարկը և հայտարարեց այդ պարտատոմսերի ցուցակման մասին՝ բորսայում երկրորդական շուկայական առևտրի համար: Այս շրջադարձային գործարքը հնարավոր դարձավ ԱՄՆ Միջազգային զարգացման գործակալության (ԱՄՆ ՄԶԳ), Կապիտալ Ինվեստմընթս-ի և ունիվերսալ վարկային կազմակերպությունների համատեղ ջանքերի շնորհիվ:
Միջոցառմանը ներկա էին Հայաստանում ԱՄՆ դեսպան Ռիչարդ Միլսը, փոխվարչապետ, Միջազգային տնտեսական ինտեգրման և բարեփոխումների նախարար Վաչե Գաբրիելյանը, Հայաստանի Կենտրոնական Բանկի փոխնախագահ Վախթանգ Աբրահամյանը, NASDAQ OMX Արմենիայի Գործադիր տնօրեն Կոնստանտին Սարոյանը, Կապիտալ Ինվեստմընթս-ի Գլխավոր տնօրեն Տիգրան Կարապետյանը, ինչպես նաև միջազգային կազմակերպությունների և ֆինանսական հաստատությունների ներկայացուցիչներ:
«Այս միջոցառումը նախ և առաջ կարևոր է նրանով, որ այն ավելի շատ ֆինանսական ռեսուրսներ հասանելի կդարձնի սպառողական վարկերի և գյուղական վայրերի զարգացման համար` օգնելով ֆերմերներին ավելացնել արտադրանքը, իսկ ձեռնարկատերերին` գործունեություն ծավալել գյուղական համայնքներում: Հայաստանում առաջին ապահովված պարտատոմսերի թողարկումը նաև հնարավորություն է ընձեռում սատարելու Հայաստանում նոր ֆինանսական պրոդուկտները: Այն համակցում է տարբեր զարգացման նախաձեռնություններ, որոնց մենք ձգտել ենք տարիների ընթացքում, այն է` վարկային համակարգում ավելի մեծ թվով ֆինանսական ռեսուրսների հասանելիություն Հայաստանի գյուղական վայրերի զարգացման նպատակով», – նշել է դեսպան Միլսը:
Թեև միկրոֆինանսավորումը լավ ձևավորված է Հայաստանում, ներկայումս այն չի կարող հավուր պատշաճի ծառայել միկրո, փոքր և միջին ձեռնարկություններին (ՄՓՄՁ)` վարկային կապիտալի բացակայության պատճառով: Միկրոֆինանսավորող կազմակերպությունները, ինչպիսին են ունիվերսալ վարկային կազմակերպությունները (ՈՒՎԿ), իրավասու չեն ավանդներ ընդունել, որը սահմանափակում է ՄՓՄՁ-ներին վարկավորելու նրանց կարողությունը: ԱՄՆ ՄԶԳ-ն իր «Ֆինանսներ տնտեսական զարգացման համար» ծրագրի միջոցով աշխատել է հինգ ՈՒՎԿ-ների հետ` ՔԱՐԴ Ագրոկրեդիտ, Գառնի Ինվեստ, Գլոբալ Կրեդիտ, Կամուրջ և Նոր Հորիզոն` նրանց օգնելու պարտատոմսեր թողարկել վարկային կապիտալի ներգրավման նպատակով: ԱՄՆ ՄԶԳ-ն օժանդակել է նախնական պարտատոմսերի նախագծման հարցում` ՀՀ Կենտրոնական Բանկի, ՈՒՎԿ-ների և ԱՄՆ ՄԶԳ Զարգացման Վարկային Մարմնի փորձագետների հետ սերտ համակարգման միջոցով:
Պարտատոմսերը թողարկվել են նորաստեղծ հատուկ նշանակության միջոցի` Վարկային Պորտֆելի Արժեթղթավորման Հիմնադրամ I-ի կողմից: Կապիտալ Ինվեստմընթս-ի կողմից ղեկավարվող Հիմնադրամը ստեղծվել է 2015թ. օգոստոսին` նպատակ ունենալով արժեթղթավորել հինգ մասնակից ՈՒՎԿ-ների 2 միլիոն դոլար արժողությամբ միկրոֆինանսավորման վարկերը: Արժեթղթավորման հիմնադրամը պարտատոմսերը հանրությանն է առաջարկում NASDAQ OMX Արմենիայում: Ներդրումը գրավիչ և համեմատաբար ոչ ռիսկային դարձնելու նպատակով 2015թ. նոյեմբերին ԱՄՆ ՄԶԳ Զարգացման Վարկային Մարմնի կողմից տրամադրվել է երաշխիք պարտատոմսերի մայր գումարի 50 տոկոսի համար: Հիմնական պարտատերեր ֆինանսական հաստատությունների թվում են կենսաթոշակային ակտիվների կառավարիչներ և բանկեր: Պարտատերերին ներկայացնում է ԱՄՆ ՄԶԳ կողմից հաստատված մեկ ընդհանուր իրավական ներկայացուցիչ` որպես գործարքի երաշխավոր:
«Բացի հնարավորություններից, որոնք կստեղծի այս արժեթղթավորման ծրագիրը, վստահ եմ, որ այն նաև խթան կհանդիսանա` ֆինանսական հաստատություններին օգնելով հաղթահարել արժեթղթավորմանն առնչվող մարտահրավերները, ինչպիսին է լիկվիդայնությունը` վստահություն ձևավորելով լավ կազմված իրավաբանական պայմանագրերի, ենթակառուցվածքների և ընթացակարգերի նկատմամբ», – միջցառման ժամանակ ասել է դեսպան Միլզը:
C-QUADRAT Ampega ակտիվների կառավարիչ կազմակերպության գործադիր տնօրեն Արման Վարդանյանի խոսքով ակտիվներով ապահովված արժեթղթերի մեկնարկը ևս մեկ քայլ է դեպի կապիտալ շուկաների խթանման գործում: «Նման թողարկումների շարունակականությունը կենսական նշանակություն ունի իրական տնտեսության և ֆինանսական ոլորտի միջև կապերի ստեղծման համար` տրամադրելով լրացուցիչ ներդրումային հնարավորություններ երկրում երկարաժամկետ ներդրողների համար», – ասել է նա:
