Անգլիայում տոն է լինելու. 50 տարի՝ առանց տիտղոսի
Դորտմունդի «Բորուսիայի» գործադիր տնօրեն Հանս-Յոախիմ Վատցկեն համեմատել է անգլիական և գերմանական ֆուտբոլը:
«Բունդեսլիգան չպետք է թաքցնի, որ ոչնչով չի զիջում անգլիական Պրեմիեր լիգային: Մենք ունենք մեծ մարզադաշտեր, միջին հաճախելիությունը մեր լիգայում էականորեն բարձր է, ակումբները գերազանց ֆուտբոլ են ցուցադրում, իսկ մեր երիտասարդությունը շատ լավ զարգանում է:
Անգլիան նույնպես 4 տեղ ունի Չեմպիոնների լիգայում: Վատ եմ պատկերացնում այն իրավիճակը, որի ժամանակ «Բորուսիայի» հաջողակ ֆուտբոլիստը գնում է «Նորվիչ» կամ «Կրիստալ Փելես»:
Մենք ֆուտբոլի Աշխարհի չեմպիոնն ենք, այն ժամանակ, երբ Անգլիայում տոն է լինելու. 50 տարի՝ առանց տիտղոսի»,- ասել է Հանս-Յոախիմ Վատցկեն Sport Bild-ին տված հարցազրույցում:
Գերմանիայի առաջնությունում Դորտմունդի «Բորուսիան» զբաղեցնում է մրցաշարային աղյուսակի 2-րդ հորիզոնականը:
Վատցկեն զբաղեցնում է «Բորուսիայի» գործադիր տնօրենի պաշտոնը 2005թ.-ից, և նրա նշանակումից հետո ակումբին հաջողվեց խուսափել սնանկացումից:
Պատրաստեց Անի Գաբուզյանը
