Թուրքիան սիրիացի փախստականներին արտաքսել է Սիրիա
Թուրքական կառավարությունը հերքել է միջազգային իրավունքի նորմերի խախտման մեղադրանքները՝ կապված սիրիացի փախստականներին հայրենիք արտահանձնման հետ, հայտնում է BBC-ն:
Ավելի վաղ փախստականները պատմել էին BBC-ին, որ սիրիացիները, որոնք փորձում էին տեղափոխվել Հունաստան, ձերբակալվել էին Թուրքիայի տարածքում, ինչից հետո նրանց պարտադրել էին հայտարարություն գրել Սիրիա կամավոր վերադարձի մասին:
Իրավապաշտպան Amnesty International կազմակերպությունը հայտարարել է, որ իրեն հայտնի են դարձել նման դեպքերի մասին ու չի բացառում, որ նրանց թիվը կարող է հարյուրների հասնել:
Թուրքիայի իշխանությունները պնդում են, որ բոլոր սիրիացի փախստականները հարցազրույց են անցել, ինչի ընթացքում հայրենիք վերադառնալու ցանկություն են հայտնել:
Միջազգային մարդասիրական իրավունքը արգելում է մարդկանց արտաքսել այն վայրեր, որտեղ ռազմական գործողություններ են ընթանում:
