Եթե Ասադը չափազանց արագ հեռանա, դա կարող է հանգեցնել «պայթյունի». Ջոն Քերի
ԱՄՆ պետքարտուղար Ջոն Քերին CNN-ին տված հարցազրույցում հայտարարել է, որ Սիրիայի նախագահը պետք է իշխանությունից հեռանա «կարգավորված անցումային գործընթացի» շրջանակում:
Մինչ այդ ԱՄՆ-ը պնդում էր, որ Սիրիայի նախագահ Բաշար Ասադը պետք է անհապաղ հեռանա, սակայն Քերին խոստովանել է, որ դա կարող է ավելի վատացնել ու խորացնել իրավիճակը:
«Եթե Ասադը չափազանց արագ հեռանա, դա կարող է հանգեցնել «պայթյունի», որը երկիրը կզրկի ցանկացած հասարակական կյանքից»,- կարծում է նա:
«Մեզ հարկավոր է աստիճանական անցում, ղեկավարելի անցում, որպեսզի չլինի հատուցման, կյանքից զրկվելու, վրեժի վախ»,- ասել է Քերին:
Նա նաև հայտարարել է, որ Սիրիայի ղեկավարությունը պետք է փոխվի «խելամիտ ժամանակում», սակայն չի նշել, թե խոսքը ինչ ժամանակի մասին է:
Բացի այդ՝ ԱՄՆ պետքարտուղարը կանխատեսել է, որ Ռուսաստանի ներկայությունը Սիրիայում կարող է Ռուսաստանի նախագահ Վլադիմիր Պուտինին գցել խճճված վիճակի մեջ:
«Եթե նա կանգնի Ասադի, Իրանի ու «Հեզբոլլահի» կողքը, ապա շատ լուրջ խնդիրներ կունենա տարածաշրջանի սուննի երկրների հետ: Դա նշանակում է, որ նա կարող է հեշտությամբ դառնալ սունիի ջիհադիստների թիրախ»,- ասել է Քերին:
