Ռուսաստանը Սիրիա ռմբակոծիչներ է ուղարկել
Ռուսական «Սու-34» ռմբակոծիչներ են ուղարկվել Սիրիայի Լաթաքիա նահանգի ավիաբազա, որտեղ ավելի վաղ Ռուսաստանը ուղարկել էր 28 ռազմական ինքնաթիռ, պնդում է ավիացիոն The Aviationist պորտալը:
Ռադարների տվյալով՝ մինչև Սիրիայի օդային տարածք մտնելը ավիախումբն անցել է Կասպից ծովի, Իրաքի ու Իրանի վրայով:
Կայքն ընդգծում է, որ ռմբակոծիչները հետևել են ՌԴ ԶՈՒ «Տու-154» ինքնաթիռին: Ինչպես հայտնում է The Financial Times-ը, հղում կատարելով իր աղբյուրներին, Ռուսաստանը պլանավորում է մոտ 2 հազար մարդ տեղակայել Լաթաքիայում կառուցվող ռուսական ավիաբազայում:
Ավելի վաղ AFP-ն, հղում կատարելով կառավարական աղբյուրներին, հայտնել է, որ Ռուսաստանը Լաթաքիայի օդանավակայանում տեղակայել է 28 ռազմական ինքնաթիռ:
Ամերիկյան հետախուզական արբանյակների տվյալներով՝ ավիաբազայում կան տասնյակ ռազմական ինքնաթիռներ, ներառյալ 4 «Սու-24» ռմբակոծիչ, 12 «Սու-25» գրոհային ու 12 «Սու-30» ռմբակոծիչ, ինչպես նաև տասնյակ ուղղաթիռներ, այլ սպառազինություն ու ռազմական տեխնիկա:
«Կոմերսանտի» տվյալով՝ 2017թ. Ռուսաստանը Սիրիային կտրամադրի ևս 12 կործանիչ:
