Ռուսաստանի ու ԱՄՆ-ի համագործակցությունը կօգնի լուծել Սիրիայի ճգնաժամը. Սպիտակ տուն
ԱՄՆ-ի նախագահ Բարաք Օբաման ու Ռուսաստանի նախագահ Վլադիմիր Պուտինը մտադիր են քննարկել Սիրիայում քաղաքական կարգավորման հեռանկարները, որի հաջողությունը հնարավոր է միայն երկու երկրների, ինչպես նաև տարածաշրջանի երկրների ու սիրիացիների համատեղ աշխատանքի դեպքում:
Ինչպես հայտնում է RIA Novosti-ն, այս մասին հայտնել է ԱՄՆ նախագահի ազգային անվտանգության հարցերով խորհրդականի տեղակալ Բեն Ռոդսը:
Լրագրողների հետ զրույցում Ռոդսը հիշեցրել է, որ ԱՄՆ-ն ու Ռուսաստանը ունեն տարաձայնություններ Սիրիայում քաղաքական ճգնաժամի կարգավորման հարցում, սակայն, միևնույն ժամանակ, հանդես է եկել այդ խնդրի լուծման համար համատեղ աշխատանքի օգտին:
«Ակնհայտ է, որ քաղաքական կարգավորման հաջողությունը հնարավոր է Ռուսաստանի, ԱՄՆ-ի, տարածաշրջանի երկրների, ու որ կարևոր է, Սիրիայի ժողովրդի աջակցությամբ: Այդ պատճառով քաղաքական կողմը քննարկվելու է, ինչպես նաև ռազմականը»,- հայտարարել է Ռոդսը:
