Արցախի պատվիրակությունը մասնակցել է «Երկրները մեկ հարկի տակ» ցուցահանդես-ֆորումին
ԼՂՀ էկոնոմիկայի նախարարության պատվիրակությունը Երևանում մասնակցել է «Երկրները մեկ հարկի տակ» ցուցահանդես-ֆորումին` ներկայացնելով ԼՂՀ զբոսաշրջային ներուժը:
ԼՂՀ էկոնոմիկայի նախարարության մամլո ծառայության փոխանցմամբ՝ Արցախը ներկայացված էր առանձին տաղավարով` ձևավորված ուրույն ավանդական ոճով:
Պատվիրակության ներկայացուցիչները տաղավարի հյուրերին բաժանել են Արցախի զբոսաշրջավայրերի մասին պատմող գրականություն, ինչպես նաև մանրամասն տեղեկատվություն են փոխանցել Արցախով հետաքրքրված այցելուներին:
Ցուցահանդես-ֆորումի շրջանակներում կազմակերպվել է նաև համաժողով, որտեղ Արցախի պատվիրակության ներկայացուցիչը հանդես է եկել զեկույցով` ԼՂՀ-ում զբոսաշրջության կայուն զարգացման ուղղությունների մասին:
Նշենք, որ ցուցահանդես-ֆորումում Արցախի պատվիրակությունը գլխավորում էր ԼՂՀ էկոնոմիկայի նախարարի տեղակալ Սերգեյ Շահվերդյանը:
