Հայտնի խաբեբա է. Ռուբեն Հայրապետյանն արձագանքում է ծեծված ազատամարտիկի հայտարարությանը. News.am
ՀՖՖ նախագահ Ռուբեն Հայրապետյանի կարծիքով՝ նախօրեին ծեծի ենթարկված ազատամարտիկ Սմբատ Հակոբյանը քաղաքական պատվեր է կատարում՝ հայտարարելով, թե իրեն ծեծողներից մեկն իր թիկնազորից է:
«Դա իրականությանը չի համապատասխանում, նա զրպարտում է ինձ, հասկացեք: Նա ուղղակի քաղաքական պատվեր է կատարում»,- NEWS.am-ի հետ զրույցում ասել է Ռուբեն Հայրապետյանը:
ՀՖՖ նախագահը նաեւ հերքել է ազատամարտիկի պնդումները, թե երեք ամիս առաջ իրենց միջեւ քաղաքական հարցերի շուրջ բանավեճ է եղել, որից հետո Հայրապետյանը սպառնացել է հաշվեհարդար տեսնել Հակոբյանի հետ:
«Նման բան չի եղել: Եթե հետաքրքրվեք իրա շրջապատով, իրա կենսագրությամբ, կիմանաք՝ ինքը հայտնի ստախոս, խարդախ, խաբեբա մարդ է եւ զրպարտում է»,-ասել է Հայրապետյանը:
Ռուբեն Հայրապետյանը վերջում խորհուրդ տվեց համոզվելու համար ստուգել՝ իր թիկնազորում Տիգրան անունով աշխատակից կա՞, թե ոչ:
«Իմ թիկնազորում Տիգրան անունով մարդ չկա: Եթե դուք ինձ չեք հավատում, գնացեք ստուգեք: Իմ թիկնազորը ոստիկանության աշխատողներ են պայմանագրով օֆիցիալ ձեւակերպված»,-ասել է ՀՖՖ նախագահը:
Նշենք, որ ազատամարտիկը լրագրողներին ասել էր, թե վստահ չէ` Տիգրանն այժմ ՀՖՖ նախագահի թիկազորում է, թե ոչ, բայց գիտի, որ ժամանակին Ռուբեն Հայրապետյանի համար է աշխատել։ Տիգրանը հրավիրվել է ոստիկանություն։
Շարունակությունը՝ սկզբնաղբյուր կայքում
