Բժշկուհու հայտարարությունը թույլ է տալիս ենթադրել, որ նա մինչև հիմա չի հասկացել, թե ինչի՞ց է մահացել Մերի Մարգարյանը. Մ. Մարգարյանի իրավահաջորդի շահերի պաշտպան
Մերի Մարգարյանի իրավահաջորդի շահերի պաշտպան Մարինե Թովմասյանն այսօրվա ասուլիսին ասաց, որ առաջին փորձաքննության եզրակացությամբ պետք է մահվան պատճառը հիմնավորվի, այնուհետև հանձնաժողովային փորձաքննությամբ նոր որոշվի յուրաքանչյուր բժշկի գործողություններն ու դրանց հետևանքով գրանցված արդյունքները, և արդյո՞ք մեղավոր անձինք կան: Նա նշեց, որ Շուշանիկ Բախշյանը վկայի կարգավիճակում է:
Փաստաբանն ասաց, որ 2006թ. սկսած ոլորտում է ու իր պրակտիկայում եզակի են դեպքերը, երբ բժշկի մեղքն ապացուցվի ու նրան դատապարտեն, իսկ պատճառները չի կարող ասել:
«Ինձ համար անհասկանալի էր, որ եթե կա առողջապահության նախարարի հրաման, որ հղիների դիմելը բժշկական հաստատություն բարձր ջերմության պարագայում պարտադիր պայման է և դա ներառված է հղիության վտանգի ցանկում ու բժիշկը հղի հիվանդին տեսնում է բարձր ջերմության պայմաններում, չպետք է սահմանափակվի միայն անալիզներ վերցնելով, առավել ևս, եթե նա պաթոլոգիա չի հայտնաբերում և կողմնակի հետազոտություններ չի իրականացնում, այլ ընդամենը հայտարարում է, որ սա վիրուս է, ապա ինչո՞ւ այդ վիրուսի մասին գրառում չկա Մերի Մարգարյանի հիվանդության քարտում: Այսինքն՝ այդ եզրակացությունն էլ որպես բժիշկ նա տվել է ուղղակի էմոցիոնալ դաշտում:
Մերի Մարգարյանի հարազատների կողմից հրապարակավ հայտարարությունները, Քննչական կոմիտեի համար հիմք հանդիսացան՝ Քրեական օրենսգրքի 130 հոդվածի երկրորդ մասով գործ հարուցելու և այնտեղ հստակ նշվեցին, որ՝ համաձայն լրատվամիջոցներին տրված եղբոր տեղեկությունների»:
Մարինե Թովմասյանը նշեց, որ չի հասցրել «Էրեբունի» բժշկական կենտրոնից ստանալ փաստաթղթերի պատճենները, որովհետև գործը գտնվում էր դատաբժիշկների տրամադրության տակ. «Ես միայն ձեռք եմ բերել «Շենգավիթ» բժշկական կենտրոնում կազմված փաստաթղթերը, և շատ կարևոր հանգամանք է, որ եթե ըստ բժշկի՝ պաթոլոգիա չկա, ապա ի՞նչն է խանգարել որպեսզի Մերին ենթարկվեր կեսարյան հատման, ինչը, հրատապ վիճակը հասկանալով, իրականացրել է «Էրեբունի» բժշկական կենտրոնը: Պրակտիկայում արդեն բավականին դեպքեր ունենք, երբ հղի կնոջ մոտ ջերմության բարձրացման պարագայում, եթե այդ պահի դրությամբ հետազոտված արդյունքներով որևէ ախտանիշ ցուց չի տալիս և հղիությունն այն ամսին է գտնվում, երբ պտուղն արդեն ձևավորված է, բժիշկները չեն վարանում, կեսարյան հատման են դիմում՝ գոնե երեխայի կյանքը փրկելու համար: Այս պարագայում մենք ունենք Մերի Մարգարյանի վիճակի ծանրացում, որը նաև վնասել է պտղին: Անգամ ծնողներն են առաջարկել, որ միգուցե կեսարյան հատում իրականացնենք, բայց պատասխանը եղել է բացասական:
Մինչև վերջին պահը հարազատները չեն հասկացել՝ Մերիի մոտ ինչ է կատարվում: Այսինքն՝ որևէ խորհրդատվություն, որևէ սիմպտոմների մասին չի նշվել:
Շատ հարցեր կան, որոնց ես այս պահին տիրապետում եմ, բայց քանի որ նախաքննություն է, ցավոք, չեմ կարող այդ հարցերի շուրջ որևէ բան ասել»:
Ըստ նրա՝ բժշկուհու նմանատիպ հայտարարությունը (լրատվամիջոցներում տարածված) թույլ է տալիս ենթադրել, որ նա մինչև հիմա չի հասկացել, թե ինչից է մահացել Մերի Մարգարյանը. «Եվ ամենակարևորը, որ Մերիի մոտ եղած սիմպտոմների պայմաններում բժիշկը դարձյալ որևէ ախտորոշում, եզրահանգում գոնե հարազատներին չի հայտնել:
Հուլիսի 23-ից մինչև 26-ը Մերիի ջերմաստիճանը 36.6 չի եղել երբեք: Այսինքն՝ նույնիսկ դեղորայքի ընդունման պարագայում 37-ից չի իջել: Իսկ վերջին օրը (ամսի 27-ին) իրականացված անալիզներից հետո բժիշկները պետք է շատ արագ միջոցներ ձեռնարկեին, որովհետև կարող եմ հավաստի ասել, որ այդ անալիզներից արդեն որոշակի տվյալներ կային: Սա հայտարարում եմ համապատասխան մասնագետների հետ խորհրդակցելուց հետո: Ինչո՞ւ հենց սկզբից չեն անցկացրել, օրինակ, թոքերի հետազոտություն, այլ՝ միայն ամսի 26-27-ին են դա արել: Այսինքն՝ եթե բժշկի նշանակած պարացետամոլ դեղահաբը նույնիսկ ջերմությունը չի իջեցրել, բժիշկը տեսել է, որ իր խորհուրդներն ու նշանակումները դրական դինամիկա չունեն, նրա գործողություններն ի՞նչ պետք է լինեին: Հարազատների դժգոհության հիմքը սա է բժշկի անտարբերությունից ու ոչ պատշաճ գործողություններից»:
