Apple Watch-ի վաճառքները ԱՄՆ-ում նվազել են 90%-ով՝ համեմատած առաջին շաբաթվա հետ
Ամերիկյան Apple ընկերության «խելացի» ժամացույցների՝ Apple Watch-երի վաճառքները նվազել են 90%-ով՝ համեմատած վաճառքի հանվելու առաջին շաբաթվա հետ, հայտնում է MarketWatch-ը՝ հղում կատարելով Slice Intelligence վերլուծական ընկերության տվյալներին:
Slice-ի տվյալով՝ Apple-ը ԱՄՆ-ում վաճառում է օրական մոտ 20 հազար ժամացույց, իսկ որոշ օրերի՝ օրական 10 հազար հատ:
Համեմատության համար նշենք, որ Apple Watch-ը ապրիլի 10-ին շուկա դուրս գալու առաջին շաբաթում վաճառել է 1,5 մլն սարք կամ միջինը՝ օրական 200 հազար Apple Watch:
Apple Watch-ի երկու երրորդը Sport հավաքածուի ժամացույցներ են, որոնց գինը սկսվում է 349 դոլարից ու ամենաէժանն գինն է:
Edition հավաքածուի ժամացույցները, որոնց կորպուսը 18 կարատանոց ոսկուց է, արժեն 10 հազար դոլար և ավելի, դրանց վաճառքներն ավելի թույլ են:
Ընկերության տվյալով՝ ընդհանուր առմամբ՝ ԱՄՆ-ում վաճառվել է նման մոտ 2000 ժամացույց:
