Թբիլիսիում ջրհեղեղից տուժածներին օգնելու համար արդեն նվիրաբերվել է 7 մլն դոլար
Թբիլիսիում ջրհեղեղից տուժածներին օգնելու ու մաքրման-վերականգնողական աշխատանքների համար արդեն մոբիլիզացվել է 15 մլն 200 հազար լարի (մոտավորապես 6,9 մլն դոլար), հայտնել է Վրաստանի վարչապետ Իրակլի Ղարիբաշվիլին: Այս մասին տեղեկացնում է newsgeorgia.ge-ն:
«Եվս մեկ անգամ ցանկանում եմ շնորհակալություն հայտնել բոլորին, ովքեր ներդրում են ունենում վերջին աղետի հետևանքների ոչնչացման գործում»,-ասել է Ղարիբաշվիլին արտակարգ շտաբի նիստում:
Նա նաև շնորհակալություն է հայտնել հատուկ ծառայություններին ու կամավորներին արված աշխատանքի համար:
Վրաստանի ֆինանսների նախարարության որոշմամբ՝ բացվել են հատուկ հաշվեհամարներ, որտեղ ցանկացողները կարող են գումար նվիրաբերել Թբիլիսիի ջրհեղեղից տուժածներին օգնելու ու աղետի հետևանքները վերացնելու նպատակով:
