Ավարտվել է 21-ամյա երիտասարդին անչափահասի կողմից դանակահարելու դեպքի առթիվ հարուցված քրեական գործի նախաքննությունը
ՀՀ քննչական կոմիտեի Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում ավարտվել է 21-ամյա երիտասարդին դանակահարելու դեպքի առթիվ հարուցված քրեական գործի նախաքննությունը:
Նախաքննությամբ պարզվել է, որ 21-ամյա Ա.Խաչիկյանին պատճառված մարմնական վնասվածքի հանգամանքները, շարժառիթը։
Քննությամբ բավարար ապացույցներ են ձեռք բերվել, որ երիտասարդին մարմնական վնասվածքը պատճառվել է 2015 թվականի ապրիլի 13-ին՝ ժամը 19:30-ի սահմաններում, թիվ 111 դպրոցի մոտ տեղի ունեցած վիճաբանության ժամանակ, անչափահասի կողմից։
Նախնական քննության արդյունքների համաձայն՝ տարաձայնությունն սկսվել է Լուկաշինի փողողի վրա գտնվող դեղատան մոտ՝ հայհոելու պատճառով, ապա գնացել են նշված դպրոցի հետնամասում գտնվող տարածք՝ պարզաբանումների համար։ Վիճաբանությունը վերածվել է քաշքշոցի, որի ժամանակ էլ անչափահասը կտրող-ծակող առարկայով հարվածել է Ա.Խաչիկյանի որովայնին՝ պատճառելով մարմնական վնասվածք ու դիմել փախուստի։
Անչափահասն ինքնակամ ներկայացել է Երևան քաղաքի Աջափնյակ և Դավթաշեն վարչական շրջանների քննչական բաժին և ցուցմունք տվել՝ դեպքի հանգամանքների վերաբերյալ։
Մինչդատական վաչույթում ձեռք բերված ապացույցների համակցությամբ անչափահաս տղային առաջադրվել է մեղադրանք՝ ՀՀ քրեական օրենսգրքի 112-րդ հոդվածի 1-ին մասի հատկանիշներով և որպես խափանման միջոց է ընտրվել հսկողությանը հանձնելը:
Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին, մեղադրական եզրակացությունը հաստատվել է, և գործն ուղարկվել է Աջափնյակ և Դավթաշեն վարչական շրջանների ընդհանուր իրավասության առաջին ատյանի դատարան:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
ՀՀ Քննչական Կոմիտե
