Հայտնաբերվել և խոտանվել է ժամկետանց սննդամթերք
ԼՂՀ Գյուղատնտեսության նախարարության Սննդի անվտանգության պետական ծառայությունն ամփոփել է ընթացիկ տարվա մայիս ամսում կատարած տեսչական աշխատանքների արդյունքները:
Ինչպես «Արցախպրես»-ին տեղեկացրեցին ԼՂՀ ԳՆ ՍԱՊ ծառայությունից, անցած ամսվա ընթացքում Սննդամթերքի անվտանգության, որակի և օպերատիվ հսկողության տեսչությունը դիտարկումներ է իրականացրել 44 տնտեսավարող սուբյեկտներում, որից 30-ը՝ Ստեփանակերտում, իսկ 14-ը Շուշիում:
Դիտարման արդյունքում 40 տնտեսավարող սուբյեկտներում հայտնաբերվել են հետևյալ խախտումները` ապրանքներն իրացվում էին առանց անվտանգությունը հիմնավորող ուղեկցող փաստաթղթերի, ինչպես նաև սննդի շղթայում ներգրավված անձնակազմը չէր ենթարկվել պարբերական բժշկական զննությունների:
Բացի այդ, հայտնաբերվել և խոտանվել են ժամկետանց՝ կաթնամթերք, հրուշակեղեն, հյութեր, պահածոյացված մթերք, քաղցրավենիք, մսամթերք, մակարոնեղեն և ձու: ԼՂՀ ԳՆ ՍԱՊ ծառայության փոխանցմամբ, դիտարկման ընթացքում հայտնաբերված խախտումների վերաբերյալ տրված ծառայության հանձնարարականները մասամբ կատարվել են, իսկ մյուս հանձնարարականների վերջնաժամկետները լրանում են ընթացիկ ամսում:
