Մարգվելաշվիլին մեկ շաբաթով հետաձգել է կառավարության նորացված կազմի հաստատումը
Новости-Грузия լրատվական գործակալության փոխանցմամբ` Վրաստանի վարչապետ Իրակլի Գարիբաշվիլին նախարարների թեկնածուների ցուցակը ներկայացրել է երկրի նախագահ Գեորգի Մարգվելաշվիլուն, որպեսզի նա կառավարության նորացված կազմը ներկայացնի խորհրդարանին` վստահություն հայտնելու համար:
Վրաստանի կառավարության մամլո ծառայության աշխատակիցը հայտարարել է, որ իրենք սպասում են նախագահի հայտարարությանը: Մարգվելաշվիլին, սակայն, հրաժարվել է ստորագրել իրեն ներկայացված ցուցակը` հայտարարելով, որ վարչապետին ու խորհրդարանին տալիս է մեկ շաբաթ ժամանակ, որպեսզի նրանք հանգիստ վիճակում հստակեցնեն կառավարության կազմը:
Մարգվելաշվիլին հայտարարել է, որ շտապելու կարիք չկա, և որ վարչապետն ու խորհրդարանը պետք է խորհրդակցություններ անցկացնեն ավելի հանգիստ վիճակում և հստակեցնեն կառավարության կազմը: Սրանից առաջ հաղորդվել էր, որ Գարիբաշվիլին հույս է հայտնել, որ կառավարության նորացված կազմի հաստատումը տեղի կունենա այս շաբաթ:
