Կարսի Քարաքալե գյուղի բնակիչները Քիմ Քարդաշյանին կոչ են արել ներդրումներ անել իր պապերի գյուղում
Թուրքական Radikal թերթի փոխանցմամբ՝ օրեր առաջ բրիտանական Daily Mail պարբերականի կողմից հրապարակած այն տեղեկությունը, թե հայկական արմատներով հեռուստաաստղ Քիմ Քարդաշյանը կարսեցի է, լայն արձագանք է ստացել կարսեցիների շրջանում:
Դրա համաձայն՝ Քիմ Քարդաշյանի մեծ պապ Թաթոս Քարդաշյանի ընտանիքը Ռուսաստանից ներկայիս Կարսի նահանգի Քարաքալե գյուղ է եկել 1887 թվականին և 1913 թվականին այստեղից Գերմանիայի տարածքով գաղթել է դեպի Ամերիկա: Ներկայումս Քարաքալեն ունի 50 տուն, ուր ապրում է 500 մարդ: Գյուղի բնակիչներն այժմ Քարդաշյանին կոչ են անում գալ և տեսնել իր պապերի գյուղը:
Բացի այդ, գյուղաբնակները Քարդաշյանին կոչ են արել ներդրումներ անել գյուղում, գյուղում կառուցել դպրոց, որը կանվանակոչվի իր անունով: Ընդգծվում է, որ գյուղացիների եկամտի կարևոր աղբյուրը պանրի ու կաթի արտադրությունն է, և որ գյուղի պանիրը հայտնի է Kars Kaşarı (KK, kaşar` թարգմանաբար ոչխարի պանիր) անվանմամբ: Գյուղացիները պատրաստ են Քիմ Քարդաշյանի պատվին անգամ անվանափոխել գյուղի պանրի անունը՝ Kars Kardashian (վերստին՝ KK):
