Մինսկի բանակցությունների արդյունքները մեծ նշանակություն ունեն Վրաստանի համար. Զուրաբ Աբաշիձե
Новости-Грузия լրատվական գործակալության փոխանցմամբ՝ Վրաստանի վարչապետի՝ Ռուսաստանի հետ հարաբերությունների կարգավորման հարցերով հատուկ ներկայացուցիչ Զուրաբ Աբաշիձեն հայտարարել է, որ Մինսկի բանակցությունների արդյունքները մեծ նշանակություն ունեն Վրաստանի համար:
Նա ընդգծել է, որ Թբիլիսիում հուսով են, թե կհաջողվի խաղաղ ճանապարհով կարգավորել Ուկրաինայի արևելքում տիրող ծանրագույն դրությունը. «Բնականաբար, դա մեզ համար կարևորագույն հանդիպում է:
Ինչպես ասել է Ուկրաինայի նախագահը, դա վերջին հնարավորությունն է՝ խաղաղ ճանապարհով կարգավորելու համար ծանրագույն այդ իրավիճակը, որն ազդում է բոլորի, այդ թվում Եվրոպայի անվտանգության վրա: Կարծում եմ, որ դա դարձել է գլոբալ խնդիր, ինչով էլ պայմանավորված է նման մեծ ուշադրությունը: Դեռ որևէ հատուկ նոր բան չկա, սակայն հավանաբար օրվա ընթացքում հայտնի կլինի»:
Վրաստանի՝ եվրոպական ու եվրաատլանտյան ինտեգրման հարցերով պետնախարար Դավիթ Բաքրաձեն նույնպես ընդգծել է «նորմանդական քառյակի» առաջնորդների բանակցությունների արդյունքների կարևորությունը նաև Վրաստանի համար:
