Ժիրայր Սէֆիլյան. Եռյակը գործում է իշխանության վերահսկողության շրջանակում
«100-ամյակը առանց ռեժիմի» շարժման առաջնորդ, Հիմնադիր խորհրդարանի քարտուղարության համակարգող, Շուշիի առանձնակի գումարտակի հրամանատար Ժիրայր Սէֆիլյանը երաշխավորում է՝ 2016 թվականին ռեժիմը չի լինելու: Ինչպես այսօր լրագրողների հետ հանդիպման ժամանակ հայտարարեց Ժ.Սէֆիլյանը, ռեժիմը, որին նա մի քանի անգամ անվանեց հակառակորդ, այս տարվա ընթացքում կզիջի իշխանությունը:
Ըստ նրա՝ «100-ամյակը առանց ռեժիմի» կարգախոսը վերաբերում է աբողջ տարվան, ոչ թե միայն ապրիլի 24-ին: Նա նշեց, որ եթե մինչև ապրիլի 24-ը չհասնեն իշխանափոխության, ապա այդ օրը բոլոր քաղաքացիներին, այդ թվում՝ արցախցիներին, կոչ արեց դուրս գալ փողոց պայքարելու՝ այլևս տուն չվերադառնալու նպատակով՝ մինչև հասնեն արդյունքի:
Հարցին, թե եռյակը նույնպես իշխանափոխություն է պաանջում, հնարավո՞ր է միանան նրանց, մասնակցեն մարտի 1-ի հանրահավաքին, Ժ.Սէֆիլյանը պատասխանեց, որ եռյակը գործում է իշխանության վերահսկողության շրջանակում, իսկ իրենք կեղծ ընդդիմության պրոցեսից դուրս են:
«Խառնակչություն չենք անելու, չենք խոչընդոտելու զոհերի ոգեկոչման արարողությանը ո՛չ Երևանում, ո՛չ Հայաստանի որևէ այլ քաղաքում: Խաղաղ գործընթաց է լինելու: Ովքեր չեն հասկանում, որ այդ օրը վերածննդի, ոչ թե սգի օր է, թող մեզ միանան հաջորդ օրը»,- ասաց Սէֆիլյանը՝ հավելելով, որ հրաժարականեր պահանջելն անիմաստ գործ է՝ գլխավոր նպատակին պետք է հասնեն:
Նա նշեց, որ ձևավորելու են քաղաքացիական բանակ, որը քաղաքացիական անհնազանդության տարբեր մեթոդներով կձերբազատվի այս ռեժիմից. «Երիտասարդներին կոչ եմ անում այսօրվանից համալրեն մեր շարքերը, ցուցակագրվեն որպես քաղաքացիական բանակի ազգային զինվոր: Դա վերաբերվում է նաև պատերազմի այն մասնակիցներին, որոնք կարողացել են իրենց հօգիները չվաճառեն»:
