Կիպրոսը պատրաստ է իր տարածքում ռուսական ռազմաբազաների տեղակայմանը
Xinhua գործակալության փոխանցմամբ` Կիպրոսը Ռուսաստանին առաջարկելու է իր տարածքում տեղակայել ռուսական ավիացիոն ու ռազմածովային բազաներ: Այս մասին կիպրական թերթերից մեկին տված հարցազրույցի ժամանակ հայտարարել է Կիպրոսի նախագահ Նիկոս Անաստասիադիսը:
Նա ընդգծել է, որ երկու երկրների միջև ռազմական համագործակցության մասին փաստաթուղթը ստորագրվելու է փետրվարի 25-ին` իր մոսկովյան այցի ժամանակ. «Կա պաշտպանական հին համաձայնագիր, որը երկարաձգվելու է, հատկացվելու է որոշակի հավելյալ ենթակառուցվածք»:
Նա մանրամասնել է, որ Կիպրոսը նման պայմանավորվածություններ ունի նաև այլ երկրների և մասնավորապես Ֆրանսիայի ու Գերմանիայի հետ: Անաստասիադիսը հավելել է, որ Կիպրոսը դեմ է Ռուսաստանի դեմ նոր պատժամիջոցներ սահմանելուն` կապված Ուկրաինայում տիրող իրավիճակի հետ.
«Մենք ցանկանում ենք խուսափել Եվրոպայի ու Ռուսաստանի միջև հարաբերությունների հետագա վատթարացումից: Կիպրոսն ու Ռուսաստանն ավանդաբար պահպանում են լավ հարաբերություններ և չեն պլանավորում փոխել դրանք»:
Անաստասիադիսը խոստովանել է, որ Ռուսաստանի տնտեսական անկումը բացասաբար է ազդել Կիպրոսի տնտեսության մի շարք ոլորտների վրա:
