Հունվարին Իրաքում ահաբեկչությունների ու բռնությունների հետևանքով զոհվել է 1375 մարդ. ՄԱԿ
BBC-ի փոխանցմամբ՝ 2015 թվականի հունվարին Իրաքում ահաբեկչական ակտերի և բռնության մյուս ձևերի հետևանքով զոհվել է 1375 մարդ: Այս մասին հայտարարել է ՄԱԿ-ի՝ Իրաքին աջակցելություն ցուցաբերելու գծով առաքելությունը (UNAMI):
Սպանվածներից 790-ը քաղաքացիական անձինք են, իսկ 585-ը՝ անվտանգության ուժերի զինծառայողներ: Զոհերի մեծ մասը (1014 մարդ) բաժին է ընկել Բաղդադին: Եվս 2240 մարդ վիրավորվել է:
UNAMI-ն ընդգծել է, որ կորուստների մասին ներկայացրած տվյալները պետք է դիտարկել որպես բացարձակ նվազագույն, քանի որ ՄԱԿ-ը տվյալներ չունի «Իսլամական պետության» վերահսկած տարածքների մասին: Ներկայումս «Իսլամական պետության» վերահսկողության տակ է գտնվում Իրաքի տարածքի մոտ 30 տոկոսը:
