Երևան – Վան ավիաչվերթը սառեցվել է
Հինգշաբթի օրը Թուրքիայի քաղաքացիական ավիացիայի գլխավոր վարչությունը անորոշ ժամանակով հետաձգել է Վան – Երևան – Վան ուղիղ չվերթերի իրականացումը: Այդ մասին հաղորդում է «Նարեկավանք Տուրն» ընկերությունը:
Ինչպես փոխանցում է Ազատություն ռադիոկայանը, այս չվերթը նախատեսվում էր իրականացնել այս տարվա ապրիլի 3-ից` հայաստանյան «Նարեկավանք Տուր» ընկերության, թուրքական «Բորաջեթ» ավիաընկերության և Վանի «Այանիս» տուրիստական գործակալության կողմից:
«Չվերթի գլխավոր նպատակն էր զարգացնել տուրիզմը և ժողովուրդների միջև մշակութային կապերը տարածաշրջանում, ինչպես նաեւ նպաստել տնտեսական և գործարար համագործակցությունը», – իր հաղորդագրությունում նշում է «Նարեկավանք Տուր»-ը` ընդգծելով, որ «կազմակերպիչները միանգամայն քաղաքականությունից հեռու մնալու մոտեցումով էին առաջնորդվում»:
«Ափսոսանքով հայտնում ենք, որ նույնը չկարողացան անել թուրքական իշխանությունները, որոնք ի վերջո թույլ տվեցին, որ քաղաքականությունը բացասական կերպով միջամտի այս խոստումնալից նախագծին: Մենք դեռ հույս ունենք, որ Թուրքիայի իշխանությունները ողջամտություն կցուցաբերեն եւ կվերանայեն իրենց որոշումը», – ասված է հաղորդագրությունում:
