Երևանի լուսաֆորները սխալ են կարգավորվում
Երևան քաղաքի Աբովյան-Սայաթ-Նովա փողոցների խաչմերուկում լուսաֆորը սխալ ձևով է կարգավորվում: Այս մասին 168.am-ին դժգոհել են մի շարք վարորդներ:
Բանն այն է, որ սկզբում վառվում է Սայաթ-Նովա փողոցով դեպի Տերյան փողոցի խաչմերուկ ընթացող մեքենաների կանաչ լույսը, դրանից հետո՝ Աբովյան փողոցով դեպի Թումանյան փողոցի խաչմերուկ ընթացողներինը, իսկ այնուհետև՝ Սայաթ-Նովա փողոցով դեպի Նալբանդյան փողոցի խաչմերուկ երթևեկող մեքենաներինը:
Երթևեկության համար ծանրաբեռնված ժամերին, երբ բացվում է Սայաթ-Նովա փողոցով դեպի Տերյան փողոցի խաչմերուկ ընթացող մեքենաների ճանապարհը, Սայաթ-Նովա-Տերյան փողոցների խաչմերուկում լուսաֆորի վրա կարմիր լույս է, և մեքենաների հոսքը չի հասցնում ազատել Աբովյան-Սայաթ-Նովա փողոցների խաչմերուկ: Իսկ այդ ընթացքում արդեն բացվում է Աբովյան փողոցով դեպի Թումանյան փողոցի խաչմերուկ ընթացողների ճանապարհը՝ այդպիսով վերոնշյալ խաչմերուկում ստեղծելով խցանումներ:
