ԱՊՀ անդամ երկրների Գլխավոր շտաբների պետերի հանդիպումը տեղի կունենա ապրիլի 10-ին
Ուկրաիանական UNN լրատվական գործակալության փոխանցմամբ՝ ԱՊՀ անդամ երկրների Գլխավոր շտաբների պետերի կոմիտեի հերթական նիստը տեղի է ունենալու Մոսկվայում, ապրիլի 10-ին: Այս մասին հայտնել է ԱՊՀ անդամ երկրների Պաշտպանության նախարարների խորհրդի քարտուղարության մամլո քարտուղար Միխայիլ Սևաստյանովը:
Վերջինիս խոսքերով՝ այդ նիստին մասնակցելու են Հայաստանի, Ռուսաստանի, Ուկրաինայի, Ղազախստանի, Ղրղզստանի, Բելառուսի, Տաջիկստանի ու Ադրբեջանի զինված ուժերի Գլխավոր շտաբների պատվիրակությունները:
Այդ հանդիպման ժամանակ կողմերը պետք է մշակեն այն միջոցառումները, որոնք առնչվելու են 1993 թվականի մարտի 12-ից գործող ռազմական նշանակության արբանյակային կապի համակարգերի օգտագործման մասին համաձայնագրում ուղղումներ կատարելուն:
Բացի այդ, պլանավորված է, որ կողմերը համաձայնեցնելու են 2014 թվականին ԱՊՀ անդամ երկրների զինված ուժերի համատեղ միջոցառումների պլանը և կհստակեցնեն դրա իրագործման ուղիները:
