Ամբաստանյալի աթոռին է հայտնվել` մտերիմի խնդրանքը չմերժելու համար
Գեղարքունիքի մարզի ընդհանուր իրավասության դատարանի դատավճռով Արտավազդ Սաղաթելյանն իր մտերիմ Արամ Մարտիրոսյանի խնդրանքը չմերժելու՝ այն է ապօրինի կերպով ձեռք բերված ռազմամթերքը տեղափոխելու և պահելու համար դատապարտվել է ազատազրկման 1 տարի 6 ամիս ժամկետով:
Նախաքննության ընթացքում պարզվել է, որ Արամ Մարտիրոսյանն իր կողմից ձեռք բերված ապօրինի ռազմամթերքը պահելու խնդրանքով դիմել է Ա. Սաղաթելյանին, իսկ վերջինս էլ չկարողանալով մերժել ընկերոջ խնդրանքը՝ հրազեն հանդիսացող «ԱԿ-74» տեսակի ինքնաձիգը, «ՊՄ» տեսակի ատրճանակը, ինչպես նաև ռազմամթերք հանդիսացող տարբեր տրամաչափի փամփուշտներն ու անհայտ տեսակի պայթուցիկ սարքը ապօրինի կերպով փոխադրել և պահել է Գավառ քաղաքի Զորավար Անդրանիկի 7 հասցեում գտնվող Մարտիրոսյանների ընտանիքին պատկանող ռեստորանի աշխատասենյակի բազմոցի մեջ:
Դատական ակտից տեղեկանում ենք, որ ամբաստանյալ Ա. Սաղաթելյանն առաջադրված մեղադրանքում իրեն մեղավոր է ճանաչել և մինչ դատաքննությունը սկսելը միջնորդել է դատական քննությունն անցկացնել արագացված կարգով:
Արտավազդ Սաղաթելյանն իր պատիժը կկրի ՀՀ ԱՆ համապատասխան քրեակատարողական հիմնարկում:
