Շիրակի մարզպետը Գյումրու դիահերձարանի նոր շենքի կառուցման համար գումար է խնդրել փոխվարչապետից
Շիրակի մարզպետ Ֆելիքս Ցոլակյանը նամակ-խնդրանքով դիմել է ՀՀ փոխվարչապետ, տարածքային կառավարման նախարար Արմեն Գևորգյանին: Գյումրու դիահերձարանի նոր շենքի կառուցման համար անհրաժետ է 100 մլն դրամ: Նամակում նշված է, որ գումարի հատկացման դեպքում, Շիրակի մարզպետարանը պատրաստ է հանդես գալ 20 տոկոս համաֆինանսավորմամբ:
«Արմենպրես»-ի թղթակցի հետ զրույցում Շիրակի մարզպետարանի աշխատակազմի առողջապահության և սոցիալական ապահովության վարչության պետ Հովհաննես Հովհաննիսյանը նշել է, որ, ըստ նախնական հաշվարկների, այս գումարի առկայության դեպքում հնարավոր կլինի ստանալ ժամանակակից պահանջներին համապատասխան դիահերձարան: «Մենք դեռևս շարունակում ենք քննարկել նոր շենքի կառուցման խնդիրը: Կա նաև քաղաքից դուրս` բնակելի տարածքներից առանձնացված կառույցը դիահերձերան դարձնելու առաջարկը: Այդ խնդիրը կլուծվի, երբ ֆինանսական մեր խնդրանք-նամակին տրվի դրական պատասխան»,-նշել է Հովհաննես Հովհաննիսյանը:
Հարցին, թե մարզի առողջապահության վարչության պետն ինչ գնահատական կտա ԱԺ պատգամավոր Հովհաննես Մարգարյանի` ԱԺ-ում Գյումրու դիահերձարանում տիրող իրավիճակի մասին հայտարարությանը և մասնավորապես այն դեպքին, երբ 78-ամյա հանգուցյալ տատիկի ձեռքի մատները կերել էին առնետները, պատասխանատուն նշել է, որ ինքը չի կարող հաստատել կամ ժխտել այդ փաստը:
«Ես զրուցել եմ դիահերձարանի տնօրենի, բոլոր բժիշկների և աշխատանկիցների հետ, և բոլորը ժխտում են այդ ինֆորմացիան: Համենայն դեպս, ես նման ինֆորմացիա չունեմ: Ինչ վերաբերում է Գյումրու դիահերձարանում աշխատող բժիշկների մասնագիտական որակներին, ճիշտ է, մեղմ ասած, Գյումրու դիահերձարանի շենքային պայմանները լավը չեն, բայց աշխատակիցները բոլորը մասնագետներ են»,-ավելացրել է Հովհաննես Հովհաննիսյանը:
