Արմեն Երիցյան. «Երբ ասեն` հերիք է, բոլ է, արդեն կարող ես գնալ՝ պարտավոր եմ գնալ, պարտավոր եմ հանձնել իմ պոստը»
Երբ երեկ ԱԺ բակում լրագրողները փորձում էին որոշ հարցերի պատասխաններ ստանալ Արտակարգ իրավիճակների նախարար Արմեն Երիցյանից, Էկոնոմիկայի նախարար Տիգրան Դավթյանն ասաց, թե հատուկ ընթացակարգ կա, ըստ որի` արգելվում է ԱԺ բակում հարցազրույցներ անելը: Ա. Երիցյանը, սակայն, պատասխանեց լրագրողների հարցերին:
Հիշեցնենք, որ նա Երևանի ավագանու ընտրություններում գլխավորելու է «Օրինաց երկիր» կուսակցության ցուցակը: Հարցին, թե ինչպե՞ս եք գնահատում Ձեր հնարավորությունները ընտրություններում, նախարարը պատասխանեց. «Ես ընդհանուր մեր ծրագրերի մասին կխոսեմ, երբ արդեն նախընտրական մեր քարոզարշավը սկսենք, իսկ ընդհանուր առմամբ, դուք գիտեք, որ «Օրինաց երկիր» կուսակցությունը որոշում է կայացրել , որ ես պետք է լինեմ ցուցակի առաջին համարը: Ունենք ծրագրեր: Մենք ոչ թե դժգոհ ենք ներակայիս քաղաքապետի աշխատանքից, այլ մեր կուսակցությունն իր ծրագրերն է ներկայացնելու, այսինքն` ինչպիսի՞ն ենք մենք տեսնում մեր քաղաքը, մեր Երևանը»:
Ինչ վերաբերում է իր հնարավորություններին, ապա Արմեն Երիցյանն ասաց. «Ես սիրում եմ պայքարել: Կարծում եմ` պետք է գնալ և աշխատել: Ինչ էլ անենք մեր երևանցիների, մեր համար ենք անելու: Կարծում եմ` դա այն պաշտոնը չէ, որ պետք է գնաս վայելես: Դա այն պաշտոնն է, որ պետք է գնաս քարշ տաս, ինչ-որ մի բեռ վերցնես քո ուսերին»:
Իսկ հարցին, թե կարելի՞ է ենթադրել, որ ինքն այլևս նախարարի պաշտոնում չի մնալու, Ա. Երիցյանը պատասխանեց. «Չէ, նման բան չկա, որովհետև այդ ամենը որոշում է Հայաստանի Հանրապետության նախագահը: Ես իմ առջև դրված խնդիրները կատարում եմ և մինչև վերջ աշխատելու եմ: Երբ ասեն, որ հերիք է, բոլ է, արդեն կարող ես գնալ՝ արդեն պարտավոր եմ գնալ, պարտավոր եմ հանձնել իմ պոստը»:
168.am-ի հարցին, թե քաղաքապետ դառնալու դեպքում ի՞նչ կփոխեիք մայրաքաղաքում, Արմեն Երիցյանը պատասխանեց. «Երբ ծրագրերը ներկայացնենք, այդ ժամանակ կասեմ: Շատ անելիքներ կան»: Իսկ մեր հաջորդ հարցին, թե ինչպիսի՞ն կլինի ընտրապայքարը, նա պատասխանեց. «Թեժ, շատ թեժ պայքար է սպասվում, և կարծում եմ, որ բոլորն էլ ամեն ինչ անելու են, որ ավելի շատ ձայներ ունենան»: Ա. Երիցյանի խոսքով` ինքը բոլորին հարգում է, և բոլորն էլ արժանի մրցակիցներ են:
