Բարսելոնայի հերթական հաղթանակն ու Մեսսիի հերթական ռեկորդը (տեսանյութ)

«Բարսելոնան» 23-րդ հաղթանակը տարավ Իսպանիայի ընթացիկ առաջնությունում և վաստաած 74 միավորով շարունակում է երկրորդ տեղում ընթացող Մադրիդի «Ռեալին» գերազանցել 13 միավորով: 28-րդ տուրում կատալոնացիները 3:1 հաշվով առավելության հասան «Ռայո Վալյեկանոյի» նկատմամբ:

Հանդիպման 25-րդ րոպեին Դավիդ Վիլյան Լիոնել Մեսսիի փոխանցումից հետո բացեց հաշիվը, 15 րոպե անց ֆուտբոլիստները տեղերով փոխվեցին. Մեսսին Վիլյայի փոխանցումից հետո կրկնապատկեց հաշիվ՝ բարելավելով սեփական ռեկորդը (արգենտինացին 18-րդ անընդմեջ խաղում դարձավ գոլի հեղինակ): 57-րդ րոպեին Մեսսին ևս մե անգամ աչքի ընկավ՝ Իսպանիայի ընթացիկ առաջնությունում խփելով իր 42-րդ գոլը:

70-րդ րոպեին հաշվի տարբերությունը կրճատեց Ռաուլ Տամուդոն, ով մի քանի վայրկյան առաջ էր փոխարինման մտել: «Ռայո Վալյեկանոյի» ֆուտբոլիստներին ավելի անել չհաջողվեց, իսկ «Բարսելոնան» մի քանի անգամ կարող էր մեծացնել հաշվի տարբերությունը, սակայն նոր գոլեր չգրանցվեցին: «Բարսելոնա» – «Ռայո Վալյեկանո»՝ 3:1:

Մարզական լրահոսն ապահովում է SportArmenia.com-ը