Ջուսի նոր տեսահոլովակում վուլգարություն չկա (լուսանկարներ)

Օրերս 168.am-ը ներկա էր երգչուհի Ջուսի նոր` «Tonight» երգի տեսահոլովակի նկարահանումներին։ Մեզ հետ զրույցում Ջուսն ասաց, որ երգի տեսահոլովակի ռեժիսորն Արմեն Փիրիմասիհինն է, ում հետ այս պահին համագործակցում է. «Նրա հետ առաջին աշխատանքը, ինչպես գիտեք, «Go» տեսահոլովակն էր, որը 30-ականների ոճի մեջ էր արվել:

Այս երգը կոչվում է՝ «Tonight», եվրո ոճի մեջ է, դուետ է 11-ամյա Կարեն Օհանյանի հետ, ով շատ տաղանդավոր և սիրունիկ տղա է: Երգի երաժշտության և գործիքավորման հեղինակը Գուժն է, իսկ խոսքերի հեղինակը` Նինա Ավագյանը, ում վերջերս եմ հայտնաբերել. շատ տաղանդավոր խոսքերի հեղինակ է»:

Կարեն Օհանյանն էլ, իր հերթին, ասաց, որ Ջուսին վաղուց է ճանաչում. «Ես ու Ջուսը որոշեցինք, որ կարելի է իրար հետ դուետ երգել, կարծում եմ` շատ լավ է ստացվում»։

Երգչուհին նշում է, որ տեսահոլովակը լինելու է եվրո ոճի մեջ և բեմադրված են պարային կատարումները: Տեսահոլովակում մասնակցում են «FIRE STYLE CREW» խմբի պարողները, որի գեղարվեստական ղեկավար Լիա Հովակիմյանը մեզ հետ զրույցում ասաց, որ ողջ տեսահոլովակի ընթացքում լինելու են բազմաոճ պարային դրվագներ։ Այս տեսահոլովակը խմբի առաջին համագործակցությունն է։ Մեր այն հարցին, թե հե՞շտ էր արդյոք Ջուսը պարել սովորում, Լիան պատասխանեց.  «Շատ արագ է սովորում, շարժումները շատ ճիշտ է անում, և ընդհանրապես նրա հետ շատ հեշտ ու հետաքրքիր է աշխատել»։

Տեսահոլովակի ռեժիսոր Արմեն Փիրիմասիհինը ևս կարծում է, որ
Ջուսի հետ աշխատելը շատ հետաքրքիր է. «Սա Ջուսի հետ երրորդ համատեղ աշխատանքն է: Նա ունի շատ վառ կերպար, որն ինձ օգնում է և էներգիա է տալիս, որ ես ստեղծագործեմ, և իմ մեջ Հայաստանում մնալու և ստեղծագործելու մեծ ցանկություն առաջանա»։

Երգի գործիքավորման հեղինակ Գուժը մեզ պատմեց երգի ընտրության պատմությունը. «Ջուսն ինձ երեկոյան զանգեց, ասաց, որ Կարենի հետ դուետ է երգելու, և հարցրեց, թե ի՞նչ պոզիտիվ, ուրախ, պարային երգ կարող եմ իրենց առաջարկել։ Ես արդեն առավոտյան այս երգը գրել էի, երաժշտության հիման վրա Նինա Ավագյանն էլ խոսքերը գրեց։ Շատ հետաքրքիր աշխատանք է ստացվում։ Երգը ուրախության մասին է, խոսքերում ասվում է` «եկեք երաժշտության աշխարհ, եկեք ուրախանանք, վայելենք այս ամեն ինչը»։ Շատ պոզիտիվ, հիշվող երգ է, կարծում եմ` հանդիսատեսի կողմից միանգամից կսիրվի»։

Նշենք, որ տեսահոլովակում Ջուսը և Կարենը հանդես են գալու երեք տարբեր կերպարներով: «Ես լինելու եմ ագրեսիվ, ռոքային, ինչպես նաև՝ մեղմ և սեքսուալ կերպարներում: Ասեմ, որ տեսահոլովակում ոչ մի վուլգարություն չեք տեսնի»,- ասաց Ջուսը:

Ավելացնենք, որ երգչուհին հագուստի հարցում համագործակցել է Քրիստինե Շահբազյանի, Արթուր Հարությունյանի, ինչպես նաև՝ Կարինա Ռաֆայելովնայի հետ: Վարսահարդարումը Սերժինն է, դիմահարդարումը՝ Մերի Հարությունյանինը: Խոսելով ապագա ծրագրերի մասին` երգչուհին ասաց, որ այս տարի ևս երեք տեսահոլովակ է նկարահանելու:

Ինչ վերաբերում է նոր ձայնասկավառակի թողարկմանը, ապա Ջուսը կարծում է, որ այս տարի, թերևս, չի հասցնի այն թողարկել, քանի որ շեշտը հիմնականում դրել է տեսահոլովակների վրա:

Տեսահոլովակի պրեմիերան տեղի կունենա ապրիլի վերջին։

Լուսանկարները` Սերժ Դավիդովի