Ռուսաստանն այսօր ստանձնել է ՄԱԿ ԱԽ-ի նախագահությունը
Ռուսական Интерфакс լրատվական գործակալության փոխանցմամբ՝ այսօրվանից Ռուսաստանը ստանձնում է ՄԱԿ ԱԽ-ի նախագահությունը: Այս մասին հայտարարել է Ռուսաստանի ԱԳՆ-ը:
Վերջինիս հաղորդմամբ՝ Ռուսաստանը՝ որպես ՄԱԿ ԱԽ-ում նախագահող երկիր, մտադիր է մարտին ուշադրության կենտրոնում պահել Աֆղանստանում առկա իրավիճակի կարգավորումը: Բացի այդ, Ռուսաստանի ուշադրության կենտրոնում են լինելու մերձավորարևելյան խնդիրները և Կոսովոյի հարցը:
ԱԳՆ-ի տարածած հաղորդագրությունում նշված է, որ Ռուսաստանը հավատարիմ է գտնվելու հավասարության, փոխադարձ հարգանքի ու այլ երկրների ներքին գործերին չմիջամտելու սկզբունքային մոտեցումներին: ՄԱԿ ԱԽ-ի նախագահությունը մեկ ամսով Ռուսաստանին է փոխանցվել Հարավային Կորեայից, իսկ Ռուսաստանն ապրիլին այն կհանձնի Ռուանդային:
Հիշեցնենք, որ ՄԱԿ ԱԽ-ը բաղկացած է 5 մշտական (Ռուսաստան, ԱՄՆ, Մեծ Բրիտանիա, Չինաստան, Ֆրանսիա) ու 10 ժամանակավոր անդամից, որոնք ընտրվում են 2 տարի ժամկետով:
