Ռուսաստանի դեսպանը մերժել է Արման Մելիքյանին
Նախագահի ընտրություններից հետո ՀՀ նախագահի թեկնածու, ԼՂՀ նախկին արտգործնախարար Արման Մելիքյանը նախաձեռնել էր հանդիպումների շարք Հայաստանում հավատարմագրված դեսպանների հետ: Առայժմ նախագահի նախկին թեկնածուին ընդունել են Չինաստանի և Մեծ Բրիտանիայի դեսպանները:
«Ես չեմ ակնկալում, որ իրենք պետք է միջամտեն մեր ներքին գործերին, բայց իրենց պատասխանատվության մասն այդ երկրները պետք է գիտակցեն»,- ասաց Արման Մելիքյանը:
Նա նշեց, որ ծրագրել էր հանդիպել ԱՄՆ-ի, Ֆրանսիայի և Ռուսաստանի դեսպանների հետ, սակայն մեկ մերժում արդեն ունի, մյուս երկուսն էլ դեռ պատասխան չեն տվել: Արման Մելիքյանը տեղեկացրեց, որ ՌԴ արտակարգ և լիազոր դեսպան Վյաչեսլավ Կովալենկոյի հետ հանդիպումը չեղյալ է հայտարարվել` պատճառաբանությամբ, թե դեսպանը ժամանակ չունի:
Նկատենք, որ նախագահի նախկին թեկնածու, փետրվարի 18-ի ընտրությունների պաշտոնական տվյալներով՝ երկրորդ տեղը զբաղեցրած Րաֆֆի Հովհաննիսյանի հետ ՌԴ դեսպանը հանդիպել է փետրվարի 26-ին:
