Օսկար մրցանակաբաշխությունը սկսվում է

Ժամեր անց՝ Երևանի ժամանակով 04.00-ին, կսկսվի Ամերիկյան կինոակադեմիայի 85-րդ Օսկար մրցանակաբաշխությունը: Սկզբում կարմիր գորգի վրայով կանցնեն համաշխարհային կինոյի աստղերը, իսկ մեկ ժամ անց տեղի կունենա բուն մրցանակաբաշխությունը, որը համարվում է աշխարհի լավագույն և ամենաշատ հանդիսատես ունեցող շոուներից մեկը:

Հիշեցնենք, որ այս տարի «Լավագույն ֆիլմ» անվանակարգում պայքարում են 9 ժապավեն՝ Ստիվեն Սփիլբերգի «Լինքոլն» (Lincoln) դրաման, Էնգ Լիի «Պիի կյանքը» (Life of Pi), Միկաել Հանեկեի «Սեր» (Amour), Քեթրին Բիգելոուի «Նպատակ թիվ մեկ» (Zero Dark Thirty), Թոմ Հուպերի «Թշվառները» (Les Misérables), Դևիդ Օ.Ռասելի «Իմ տղամարդը խելագար է» (Silver Linings Playbook), Բեն Զայտլինի «Վայրի Հարավի գազանները» (Beasts of the Southern Wild), Քվենտին Տարանտինոյի «Ազատ արձակված Ջանգոն» (Django Unchained) և Բեն Աֆլեկի «Արգո» (Argo) ժապավենները: Վերջինս համարվում է մրցանակաբաշխության գլխավոր ֆավորիտը:

Լավագույն դերասան կարող են ճանաչվել Խոակին Ֆենիքսը («Վարպետը»), Բրեդլի Կուպերը («Իմ տղամարդը խելագար է»), Հյու Ջեկմենը («Թշվառները»), Դենզել Վաշինգտոնը («Թռիչք») և կրկնակի օսկարակիր Դենիել Դեյ-Լյուիսը («Լինքոլն»):

Հետաքրքիր է մրցակցությունը դերասանուհիների շարքում: 9-ամյա Քուվենժանե Ուոլիսի («Վայրի Հարավի գազանները») և 85-ամյա Էմանուել Ռիվայի («Սեր») հետ պայքարում են երիտասարդներ Ջեսիկա Չեստեյնը («Նպատակ թիվ մեկ»), Նաոմի Ուոթսը («Անհնարինը») և Ջենիֆեր Լոուրենսը («Իմ տղամարդը խելագար է»):

Օսկարի հիմնական ֆավորիտներից է համարվում նաև երգչուհի Ադելը, ում Skyfall ստեղծագործությունը պայքարում է «Լավագույն երգ անվանակարգում»:

Թոմսոն