Երեք սցենար` ըստ Սերժ Սարգսյանի. մամուլ
«Սերժ Սարգսյան – Րաֆֆի Հովհաննիսյան հանդիպումից հետո ՀՀԿ նախագահը ՀՀԿ գործադիր մարմնի նիստում ներկայացրել է իրենց զրույցի մանրամասները»,- գրում է «Հրապարակ» օրաթերթն ու հավելում.
«Նա ասել է, որ հանդիպումն անցել է բավական «կառուցողական» մթնոլորտում: Ինքը Րաֆֆուն ներկայացրել է հետընտրական զարգացումների երեք սցենար.
1. Րաֆֆին դառնում է ընդդիմության նոր բևեռ, պայքարը կառուցում քաղաքակիրթ նորմերի վրա, ընդունում է, որ այս ընտրություններում զբաղեցրել է երկրորդ տեղը և ըստ այդմ էլ շարունակում է քաղաքական դաշտում իր պայքարը:
2. Րաֆֆին և իր համախոհները գնում են ռադիկալ քայլերի՝ պատրաստ լինելով իրենց նկատմամբ նույնանման արմատական քայլերի ու որոշումների իշխանությունների կողմից:
3. Րաֆֆին համագործակցում է ՀՀԿ-ի հետ, ու «աշխատում են միասին»:
«Մտածիր»,- ասել է Սերժ Սարգսյանը Րաֆֆուն: ԳՄ-ին Սերժ Սարգսյանն ասել է՝ մենք խնդիր չունենք, թող որոշեն, գան-ասեն, երեք սցենարներին էլ պատրաստ ենք:
Սակայն, դատելով նրանից, որ Րաֆֆին Սերժ Սարգսյանի մոտից դուրս գալուց հետո հանդիպել է ՀՅԴ ներկայացուցիչների հետ, ապա կոչ արել ընդդիմության բոլոր ներկայացուցիչներին՝ միավորվել իրեն, որ միասին շարունակեն պայքարը, հակված չէ ընդունել միասին աշխատելու առաջարկը: Մեզ հետ զրույցում «ժառանգականներն» էլ էին ռադիկալ տրամադրված և գտնում էին, որ դժվար թե իրենք մտնեն կոալիցիա»:
