ԵՄ-ը պետք է իր վերահսկողության տակ առնի Nabucco West գազատարի նախագծի իրագործման հարցը. Էրդողան
Թուրքական TRT Haber հեռուստաալիքի փոխանցմամբ՝ Թուրքիայի վարչապետ Ռեջեփ Էրդողանը հանդիպել է Հունգարիայի վարչապետ Վիկտոր Օրբանի հետ: Հանդիպման ժամանակ Էրդողանն անդրադարձել է Nabucco West գազատարի նախագծի իրագործման խնդրին.
«ԵՄ-ը պետք է իր վերահսկողության տակ առնի Nabucco West գազատարի նախագծի իրագործման հարցը: Թուրքիան տարանցիկ երկիր է գազատարի կառուցման հարցում: Թուրքիան պատրաստ է բոլոր ջանքերը ներդնել գազատարի արագ կառուցման համար»:
Nabucco West գազատարը սկիզբ է առնելու թուրք-բուլղարական սահմանից, դրա երկարությունը կազմելու է 1300 կիլոմետր, որից 412 կիլոմետրը բաժին է ընկնում Բուլղարիայի տարածքին, 469 կիլոմետրը՝ Ռումինիային, 384 կիլոմետրը՝ Հունգարիային, 47 կիլոմետրը՝ Ավստրիային:
Հիշեցնենք, որ ադրբեջանական գազը թուրք-բուլղարական սահման է հասցվելու «Անդրանատոլիական» գազատարով (TANAP), որի երկարությունը կազմում է մոտ 2000 կիլոմետր և որը Թուրքիայի արևելքից ձգվելու է արևմուտք:
