Ես ընտրություններին գնում եմ՝ արդեն հրաժարական տված. Պ. Հայրիկյան
Ինձ համար ակնհայտ է, որ ժողովուրդը մեկ ցանկություն ունի՝ տեսնել միավորված թեկնածուներին: Այս մասին այսօր լրագրողների հետ հանդիպման ժամանակ հայտարարեց ՀՀ նախագահի թեկնածու, ԱԻՄ առաջնորդ Պարույր Հայրիկյանը: «Մարդիկ ուզում են աթոռակռիվ տալու փոխարեն միասնական ճակատով իրականացնել օգտակար ծրագրերը: Սրա իրականացման համար ես ծրագրային տեսանկյունից ամենակարևոր քայլն արել եմ՝ չէ՞ որ դա պահանջում է ինչ-որ մեկի հրաժարականը: Իսկ ես ընտրություններին գնում եմ՝ արդեն հրաժարական տված: Բազմիցս ասել եմ, որ նախագահ եմ լինելու վեց ամսից երկու տարով»,- նշեց նա:
Այն դեպքում, երբ չհաջողվի միավորվել թեկնածուների միջոցով, միավորման երկրորդ տարբերակը Պարույր Հայրիկյանը տեսնում է ցանկացած քաղաքական գործչին ձայն տվող քաղաքացիների միջոցով: Իսկ միավորման երրորդ տարբերակն այսպիսին է. ձայն տալով Րաֆֆի Հովհաննիսյանին՝ դուք ձայն եք տալիս Րաֆֆի Հովհաննիսյանին և վերջ: Ձայն տալով Սերժ Սարգսյանին, դուք ձայն եք տալիս Սերժ Սարգսյանին: Ձայն տալով Բագրատյանին՝ դուք ձայն եք տալիս Բագրատյանին: Իսկ ձայն տալով Հայրիկյանին՝ դուք ձայն եք տալիս Րաֆֆի Հովհաննիսյանին, Հրանտ Բագրատանին, Սերժ Սարգսյանին, որովհետև չեմ պատրաստվում մենակ տանել այս բեռը»,- ասաց նա:
