Ֆրանսիական դատարանը Peugeot Citroen-ին արգելել է կրճատել աշխատակիցներին
Փարիզի վերաքննիչ դատարանը դադարեցրել է PSA Peugeot Citroen ավտոարտադրողի կողմից ընդունված ռեստրուկտուրիզացիայի (կառուցվածքային փոփոխությունների) ծրագիրը։ Այդ մասին, ըստ Agence France-Presse-ի, հայտարարել է աշխատակիցների փաստաբան Ֆեոդոր Նիլովը։
Նախորդ տարվա հուլիսին Peugeot Citroen-ը պաշտոնապես հայտարարեց, որ փոփոխությունների շրջանակներում պատրաստվում են աշխատանքից կրճատել 8000 աշխատատեղ։ Այն ժամանակ հայտարարվում էր, որ փակվելու է Օլնե-սու-Բուայում (Փարիզի արվարձան) գտնվող գործարանը, որի արդյունքում աշխատանքը կկորցներ 3 հազար մարդ։
Ընկերությունը նշում է, որ ստիպված է եղել գնալ այդ քայլին՝ Եվրոպայում մեքենաների նկատմամբ պահանջարկի անկման պատճառով։ Peugeot Citroen-ը նաև խոստացել էր կրճատված աշխատողներին նոր աշխատանքի տեղավորել։
Վերակառուցման ծրագիրն անվավեր ճանաչելու հայցով դատարան էր դիմել Faurecia գործարանի արհմիությունը (գործարանը դետալներ է արտադրում Peugeot Citroen-ի համար)։ Faurecia-ն նշում է, որ Peugeot Citroen-ի քայլերը կարող են ազդել նաև իրենց աշխատակիցների վրա։ Իսկ այդ ազդեցության մասին իրենք պատշաճ կերպով չեն տեղեկացվել։
