Իրանի ու «Վեցյակի» միջև բանակցությունները կարող են տեղի ունենալ փետրվարին
Բրիտանական Reuters լրատվական գործակալության փոխանցմամբ՝ Իրանի միջուկային ծրագրի վերաբերյալ այդ երկրի և տվյալ հարցում միջազգային միջնորդ խումբ հանդիսացող «Վեցյակի» միջև բանակցությունները կարող են տեղի ունենալ փետրվարին: Այս մասին գործակալությանը հայտնել է ԵՄ-ում եղած աղբյուրը: Վերջինս փետրվարյան տարբերակն առավել հավանական է համարել:
Ավելի վաղ նշվում էր, որ այդ բանակցությունները տեղի են ունենալու հունվարի 28-29-ին, սակայն բանակցությունների անցկացման վայրի հարցը շարունակում էր մնալ բաց: Այս շաբաթ Իրանի ԱԳՆ-ը առաջարկեց դրանք անցկացնել Եգիպտոսի մայրաքաղաք Կահիրեում: 2012 թվականին Իրանի ու «Վեցյակի» միջև անցկացվել է բանակցային երեք փուլ. ապրիլի 14-ին՝ Ստամբուլում, մայիսի 23-24-ին՝ Բաղդադում և հունիսի 18-19-ին՝ Մոսկվայում:
Հիշեցնենք, որ նախորդ տարի Իրանը քանիցս հայտարարել է, որ իր միջուկային ծրագրի վերաբերյալ բանակցություններ չի անցկացնի ԵՄ-ում, քանի որ նա պատժամիջոցներ է սահմանել իր հանդեպ:
