«Սերն ինձ համար անսպառ թեմա է»
Տարին դեռ նոր-նոր է սկսվում, սակայն առաջին իսկ օրերից հայկական էստրադայի երգադարանը պարբերաբար ավելանում է նոր երգերով: Երգիչ Սարգիս Ավետիսյանը ևս իր ունկնդրի դատին ներկայացրեց նոր տեսահոլովակ, որը կոչվում է «Սեր առաջին հայացքից»:
Երգը ռիթմիկ է, թեթև: Խոսքերի հեղինակը Գրիգոր Կյոկչյանն է, երաժշտության հեղինակը` Ռուզաննա Անդրեասյանը, տեսահոլովակի ռեժիսորն է Դավիթ Միրոյանը, իսկ պարի բեմադրության հեղինակը Վիկա Մարտիրոսյանն է:
Նշենք, որ երգիչը տեսահոլովակի պրեմիերայի կապացությամբ շնորհավորական խոսքեր է ստացել ոչ միայն իր երկրպագուներից, այլև իր աշխատանքներին հետևող կոլեգաներից: Օրինակ, երգչուհի Սիլվա Հոկոբյանն իր ֆեյսբուքյան էջում շնորհավորել է արտիստին՝ նոր տեսահոլովակի կապակցությամբ: «Սաքո շնորհավոր: Շատ ուրախ եմ քեզ համար և ուզում եմ, որ նման անակնկալներ մեզ դեռ շատ մատուցես, եղբայր ջան: Քեզ շատ հաջողություններ, միշտ առաջ ու միշտ տաղանդդ թող չպակասի»,- գրել է Սիլվա Հակոբյանը:
168.am-ը զրուցեց երգիչ Սարգիս Ավետիսյանի հետ՝ պարզելու համար, թե ո՞ւմ մասին է երգում և թե ինչո՞ւ է նա իր հերթական տեսահոլովակը նկարահանել դարձյալ սիրո թեմայով:
– Եվս մեկ երգ ու էլի սիրո մասին: Ի՞նչ ես կարծում իրո՞ք այդքան շատ բան կա սիրո մասին ասելու, թե ուղղակի պահանջված թեմա է:
– Կոնկրետ ինձ համար դա անսպառ թեմա է: Ես չեմ հոգնում երգել սիրո մասին:
– Թեթև, հեշտ հասկանալի կատարում է: Ի՞նչ ես կարծում, ո՞ւմ առավել հոգեհարազատ կլինի քո նոր երգը:
– Երգը ռումբայի և լատինո ոճերի միախառնումն է: Իմ կարծիքով՝ երգը կլսեն այն մարդիկ, ովքեր զգացել են սեր առաջին հայացքից կամ եթե հանդիպել են իրենց կյանքում սիրունիկ աղջկա:
– Այսինքն՝ դու հանդիպե՞լ ես սիրունիկ աղջկա կամ ապրե՞լ ես այդ զգացումը:
– Այդպիսի դեպք եղել է իմ կյանքում, բայց այս երգը կոնկրետ այդ մասին չէ: Հուսով եմ, որ մարդիկ լսելով այդ երգը՝ կհիշեն իրենց առաջին սիրուն:
– Դու քեզ ո՞ր տարիքային խմբի նախընտրած երգիչն ես համարում:
– Եթե կոնկրետ այս երգի մասին է, ապա շատ կցանկանայի, որպեսզի բոլոր տարիքային խմբերն էլ լսեին: Իսկ առհասարկ, հավատացեք, բոլոր տարիքային խմբերում էլ ունկնդիր ունեմ: Իմ երգերը բոլորի կողմից են ջերմ ընդունելության արժանացել, բարի խոսքեր շատ եմ լսել:
– Սնդրադառնանք բարեմաղթանքներին: Գիտեմ, որ հայկական շոու–բիզնեսից էլ են քեզ շնորհավորել պրեմիերայի կապակցությամբ: Ո՞ւմ շնորհավորանքն է քեզ համար շատ թանկ:
– Բոլորի խոսքերն էլ ինձ համար շատ թանկ են, եթե, իհարկե, սրտանց են:
– Առջևում նախագահական ընտրություններն են, ոմանց նախընտրական հոլովակներն արդեն պատրաստ են, դու որևէ թեկնածուի նախընտրական հոլովակում նկարահանվե՞լ ես:
– Ոչ, չեմ նկարահանվել:
