Մեղադրվում է նախագահի կայքի վրա հարձակում գործելու մեջ

Դաշնային անվտանգության ծառայությունը դատարան է փոխանցել Կրասնոյարսկ քաղաքի 30-ամյա բնակչի վերաբերյալ գործի նյութերը, հաղորդում է BBC-ն: Երիտասարդը մեղադրվում է ՌԴ նախագահի կայքի վրա՝ ընդդիմադիրների «Միլիոնների» արշավին օժանդակելու նպատակով, հակերական հարձակում կազմակերպելու համար:

Գործը հարուցվել է ՌԴ քրեական օրենսգրքի «Վնասաբեր համակարգչային ծրագիր ստեղծելու, օգտագործելու և տարածելու» հոդվածի հատկանիշներով, որը նախատեսում է մինչև 4 տարի ազատազրկում:

«2012թ. մայիսի 9-ին քաղաքացին կազմակերպել է ՌԴ նախագահի կայքի վրա հակերական հարձակում, որի հետևանքով համացանցային այդ ռեսուրսը մեկուսացվել է» ,- համարում է քննությունը:

Մեղադրյալը չի ընդունում մեղքը: Նա պնդում է, որ ինքը չի իմացել, որ իր կողմից օգտագործված համակարգչային ծրագիրը վնասաբեր է:

Հիշեցնենք, որ «Միլիոնների» արշավը Մոսկվայում և Ռուսաստանի այլ քաղաքներում տեղի է ունեցել 2012թ. մայիսի 6-ին,Վլադիմիր Պուտինի երրորդ նախագահական ժամկետի երդմնակալությունից մեկ օր առաջ: Մոսկվայում այդ ակցիան ավարտվեց ցուցարարների և ոստիկանության բախումներով, թեև այդ միջոցառումը համաձայնեցված է եղել Մոսկվայի քաղաքապետարանի հետ:

«Փաստինֆո»