Էրդողանը երաշխավորել է քուրդ զինյալների կողմից երկիրը լքելու անվտանգությունը
Թուրքական Hürriyet թերթի փոխանցմամբ՝ աֆրիկյան շրջագայությունից վերադարձող Թուրքիայի վարչապետ Ռեջեփ Էրդողանը լրագրողների հետ զրույցում հայտարարել է, որ Թուրքիան ստեղծելու է բոլոր անհրաժեշտ պայմանները, որպեսզի «Քրդստանի աշխատավորական» կուսակցության զինյալները կարողանան անարգել լքել երկրի տարածքը:
Էրդողանը հավելել է, որ ավելի վաղ Թուքիայում գրանցվել է նախադեպ, երբ քուրդ զինյալները Թուրքիայի տարածքը լքելիս ենթարկվել են հարձակման թուրքական բանակի կողմից, մինչդեռ այս անգամ Թուրքիան երաշխավորում է երկրից քուրդ զինյալների հեռանալու անվտանգությունը:
Ավելի վաղ Էրդողանը հայտարարել էր, որ Թուրքիայի համար կարևոր է նվազագույն կորուստներով ահաբեկչության խնդրի լուծումը, որի տակ նա նկատի ունի PKK-ն:
Հիշեցնենք, որ թուրքական իշխանությունները PKK-ի խնդրին վերջ դնելու նպատակով ներկայումս բանակցություններ են վարում նրա հիմնադիր, քուրդ առաջնորդ Աբդուլլահ Օջալանի հետ, ով 1999 թվականից ցմահ ազատազրկում է կրում Մարմարա ծովի Իմրալը կղզու բանտում:
