Շփման գծի դիտարկման ժամանակ ադրբեջանական կողմը ԵԱՀԿ առաքելությանը դուրս չի բերել առաջապահ դիրքեր
Ռուսական Regnum լրատվական գործակալության փոխանցմամբ՝ ԵԱՀԿ-ն այսօր հերթական դիտարկումն է անցկացրել ղարաբաղա-ադրբեջանական շփման գծում: Այն անցկացվել է Մարտակերտի շրջանի Սեյսուլան բնակավայրի ուղղությամբ: Այս մասին հայտնել է ԼՂՀ ԱԳՆ-ի մամուլի ծառայությունը:
Վերջինիս հաղորդմամբ՝ հայկական կողմից դիտարկումն անցկացրել են ԵԱՀԿ գործող նախագահի անձնական ներկայացուցչի դաշտային օգնականներ Իրժի Աբերլեն և Խրիստո Խրիստովը: Շփման գծի հակառակ կողմից դիտարկումն իրականացրել են ԵԱՀԿ գործող նախագահի անձնական ներկայացուցչի դաշտային օգնականներ Ուիլյամ Փրայորն ու Եվգենի Շարովը:
Դիտարկման ժամանակ հրադադարի ռեժիմի խախտման միջադեպեր չեն գրանցվել, սակայն ադրբեջանական կողմը ԵԱՀԿ առաքելությանը դուրս չի բերել առաջապահ դիրքեր, ինչի հետևանքով դիտարկում իրականացնող խումբը ստիպված է եղել դա անել ավելի հեռու տարածությունից:
