Մուրադյանի ծնոտը կոտրված չէ (լուսանկարներ)

Քիչ առաջ 168.am-ի խմբագրություն էր այցելել ԱԺ ՀՀԿ-ական պատգամավոր Մուրադ Մուրադյանը, որպեսզի ապացուցի, որ իր ծնոտը կոտրված չէ: Մենք կարող ենք փաստել, որ Մուրադյանի ծնոտը կոտրված չէր, ինչից, իհարկե, չի բխում, որ նրա և ԱԺ պատգամավոր Վահրամ Բաղդասարյանի մասնակցությամբ ծեծկռտուք տեղի չի ունեցել:

Հիշեցնենք, որ երեկ գրել էինք, որ դեկտեմբերի 25-ին «Ռենեսանս» ռեստորանում կոալիցիոն խնջույքի ժամանակ, որին մասնակցել են նախագահ Սերժ Սարգսյանը, ԱԺ նախագահ Հովիկ Աբրահամյանը, վարչապետ Տիգրան Սարգսյանը, նախարարներ և պատգամավորներ ծեծկռտուք է տեղի ունեցել ԱԺ պատգամավորներ Մուրադ Մուրադյանի և Վահրամ Բաղդասարյանի մասնակցությամբ:

Բաղդասարյանը, ով երիտասարդ տարիներին զբաղվել է բռնցքամարտով, իր մերձավոր շրջապատում ասել էր, որ ինքն այնպես է հարվածել Մուրադյանի ծնոտին, որ այն «պոկվել է»: Դրանից հետո Մուրադյանը կանչել է համագյուղացիներին, Բաղդասարյանին համարժեք պատասխան տալու համար:

Ինչո՞ւ են Վահրամ Բաղդասարյանը և Մուրադ Մուրադյանը համառորեն փորձում հերքել ծեծկռտուքի փաստը: Պարզ է, որ նրանց երկուստեք ձեռնտու չէ դրա հրապարակայնացումը, քանի որ այդ դեպքում պետք է հարուցվի քրեական գործ և պատգամավորները պետք է մեղադրվեն խուլիգանության մեջ, որը քրեորեն դատապարտելի արարք է: Բացի այդ, չբողոքելով պատգամավորներն իրենց «ճիշտ» են պահում, իսկ ճշտին նվիրվածությունը խորհրդարանում համարվում է կարևոր արժանիք:

Մեր ունեցած տեղեկություններով՝ պատգամավորները միջնորդների միջոցով պայմանավորվել են հաշտվել: Առջևում Ամանոր է, և համերաշխությունը` նաև ԱԺ ՀՀԿ-ական պատգամավորների միջև կարևոր է:

Ի դեպ, երեկ Վահրամ Բաղդասարյանը խոստացել էր Վանաձորից այսօր վերադառնալուն պես այցելել խմբագրություն՝ապացուցելու համար, որ իր հետ նույնպես ամեն բան կարգին է, սակայն այսօր նրա հեռախոսն անհասանելի է:

Լուսանկարները՝ Սերժ Դավիդովի