Չեն շտապում նաև դիտորդները
Չնայած արդեն 10-րդ օրն է, ինչ ԿԸՀ-ն սկսել է դիտորդական առաքելություն իրականացնող կազմակերպությունների հավատարմագրումը, սակայն դեռևս որևէ դիմում չի ստացվել:
«Այս պահի դրությամբ ոչ միջազգային, ոչ տեղական դիտորդները հավատարմագրման դիմում չեն ներկայացրել: Օրենքով սահմանված ժամկետները պահպանվում են»,- 168.am-ին ասաց ԿԸՀ մամուլի քարտուղար Հերմինե Հարությունյանը:
Համաձայն ԸՕ-ի 30-րդ հոդվածի, դիտորդների հավատարմագրումը կամ հավատարմագրված դիտորդների ցանկում փոփոխություններ կատարվում է ընտրության նշանակվելու օրվանից, բայց քվեարկության օրվանից ոչ ուշ, քան 10 օր առաջ: Այսինքն` մինչև 2013թ. փետրվարի 8-ը, ժամը 18:00-ն դիտորդական կազմակերպությունները կարող են դիմում ներկայացնել:
Հիշեցնենք, որ 2008թ. նախագահի ընտրությունների ժամանակ դիտորդական առաքելություն իրականացրել են 39 տեղական և 6 միջազգային կազմակերպություններ:
Ըստ ԿԸՀ սահմանված ժամանակացույցի, այսօր լրանում է վերջնաժամկետը, երբ հեռուստառադիոընկերությունները պետք է հրապարակեն վճարովի եթերաժամի մեկ րոպեի սակագինը:
ԿԸՀ մամուլի քարտուղարը նշեց, որ հեռուստառադիոընկերությունների ցանկը ԿԸՀ է ներկայացնում ՀՌԱՀ-ը` սահմանված սակագներով, և ժամը 18:00-ից հետո Կենտրոնական ընտրական հանձնաժողովն իր կայքում կհրապարակի ստացված տեղեկությունները:
