Գալուստ Սահակյանը «պրոֆիլակտիկայի» է ենթարկում դիմակավորված պատգամավորներին
Այսօր ԱԺ-ում 2013թ. պետական բյուջեի նախագծի քննարման ժամանակ ՀՀԿ խմբակցության ղեկավար Գալուստ Սահակյանը հայտարարեց, թե «տեսագրումն ու խոսափողը երբեմն դիմակավորում են բոլորիս, մասնավորապես՝ մարդիկ խոսում-խոսում են՝ միջանցքում մի ուրիշ բան, էստեղ՝ մի ուրիշ»:
168.am-ը Գ. Սահակյանից հետաքրքրվեց, թե ո՞ր պատգամավորներին էր վերաբերում իր ակնարկը:
«Եթե ասելու լինեի՝ ամբիոնից կասեի»,- ի պատասխան, ասաց Գ. Սահակյանը:
Հարցին, թե այդ դեպքում ինչո՞ւ նման բան հայտարարեցիք, եթե չէիք ասելու, թե դա ում է վերաբերում, ՀՀԿ խմբակցության ղեկավարը պատասխանեց. «Որովհետև նման դեպքերում նախ զգուշացնում ես, որ ամեն ինչ պարզ է: Այսինքն` խնդիրը հետևյալը չէ, որ մարդկանց մատնանշես: Խնդիրը հետևյալն է, որ էդ գործընթացներն ընդհանրապես չլինեն, ավելի լուրջ մոտենան: Այսինքն` ավելի կարևորը պրոֆիլակտիկան է, քան մարդկանց խարազանելը, որ ամեն ինչ նկատելի է, ամեն ինչ զգում ենք, ամեն ինչ տեսնում ենք»:
Մեր դիտարկմանը, թե տպավորությունն այնպիսին էր, որ Ձեր «պրոֆիլակտիկ ուղերձն» ավելի շատ ուղղված էր ընդդիմությանը, Գ. Սահակյանը ասաց. «Տպավորությունն այլ բան է, ես ընդհանուր հռետորիկա եմ օգտագործել, որ ժամանակն է դիմակները հանելու, ժողովրդի մոտ կանգնել այնպես, ինչպիսին դու ինքդ ես»:
Իսկ հարցին, թե այդ պրոֆելակտիկ հայտարարությունից հետո կեցվածքի փոփոխություններ նկատե՞լ եք «այդ մարդկանց» մոտ, ՀՀԿ խմբակցության ղեկավարը պատասխանեց. «Դա միանգամից չի կարող արտահայտվել, բայց ժամանակի ընթացքում, կարծում եմ` կարտահայտվի, որովհետև միայն ես չեմ խոսում այդ մասին: Այդ մասին խոսում են նաև պատգամավորներ, քաղաքական գործիչներ, կայքեր, սոցիալական կայքեր»:
