Մեր օլիմպիականները վերադարձան Լոնդոնից (լուսանկարներ)
50-ից ավելի երկրպագուներ «Զվարթնոց» օդանավակայանում երգ ու պարով դիմավորեցին հայ օլիմպիականներին: Մեդալներ նվաճած մեր երեք մարզիկները` Արսեն Ջուլֆալակյանը, Արթուր Ալեքսանյանն ու Հռիփսիմե Խուրշուդյանն արժանացան պատվո դափնեպսակների:
Լոնդոնի Օլիմպիական խաղերի բրոնզե մեդալակիր Հռիփսիմե Խուրշուդյանն, արցունքները դժվարությամբ թաքցնելով, ասաց, որ իր երջանկությանը չափ չկա և իր կյանքի ամենաուրախ պահերն է ապրում ու միայն Երևանում գիտակցեց իր նվաճած մեդալի արժեքը: Հռիփսիմեն անընդհատ կրկնում էր, որ ինքը երջանիկ է:
Մեր մյուս բրոնզե մեդալակիրը` հունահռոմեական ոճի ըմբիշ Արթուր Ալեքսանյանը, նշեց, որ ինքը գոհ չէ իր ցուցադրած արդյունքից և Օլիմպիական խաղերում չկարողացավ ինչպես հարկն է դրսևորել իրեն: Այդուհանդերձ, Արթուրը նույնպես չէր թաքցնում ուրախությունը:
Իսկ արծաթե մեդալակիր Արսեն Ջուլֆալակյանի տրամադրությունն ամենբարձրն էր, նա ողջագուրվում էր բոլորի հետ, շնորհակալություն հայտնում և կատակում երկրպագուների ու լրագրողների հետ:
ՀՀ սպորտի նախարար Հրաչյա Ռոստոմյանն իր հերթին նշեց, որ թեև Լոնդոնում Հայաստանի օլիմպիական հավաքականն ավելի բարձր տեղ է զբաղեցրել, քան Պեկինում, բայց անպայման փոփոխություններ և հրաժարականներ կլինեն:
Մարզական լրահոսն ապահովում է SportArmenia.com-ը
